Өрөспүүбүлүкэҕэ сүөһү маассабай төрөөһүнэ бара турар

Уһун тымныылар уҕарыйан, кулун тутар ый ортолоһон биллэ сылыйда. Кыстык түмүктэнэрэ икки ыйтан ордук кэм хаалла. Бүгүҥҥү күҥҥэ Өрөспүүбүлүкэ үрдүнэн 166 000 тахса төбө ынах-сүөһү кыстаан турар, онтон ыанар ынаҕын ахсаана 70 000 тахса.  Күөххэ үктэнэргэ, ыам ыйа бүтүөр диэри тиийэр от баар диэн тыа хаһаайыстыбатын министиэристибэтигэр иһитиннэрэллэр. Сылгы кыстыга эмиэ этэҥҥэ барар, сорох улуустарга сылгыларын ахсаанын аҥара эбии аска киирэн турар.

Александра Петрова, ТХМ сүөһү иитиитигэр департаменын сүрүннүүр исписэлииһэ: «Сылгыбыт ахсаана Өрөспүүбүлүкэ үрдүнэн 178 900 төбө, онтон биэтэ 121 400 төбө уонна 59 800 төбө сылгы эбии аска киирэн турар. Бу 50%-тан тахса Илин Эҥэр улуустарыгар уонна Бүлүү Бөлөх улуустарыгар».

Ааспыт дьыл хаһааҥҥытааҕар даҕаны үтүө, өҥ сайын туран, кыстыкка киириигэ былааннаммыт от барыта оттоммута.

Улуустарынан ыллахха кыстык үксүлэригэр кэминэн баран иһэр. Нам улууһугар 10 000 тахса ынах сүөһүлээхтэр, онтон ыанньыгын ахсаана 3800. Бүгүҥҥү күҥҥэ сэттэ сүүстэн тахса ньирэй төрөөтө, онон төрөөһүн уопсай ахсаантан 20% тэҥнэстэ. Улууска сылгы 12 000 тахса баар, биэтин ахсаана 8500. Билигин эбии аска 3000 кэриҥэ сылгы киирэн турар.

Владимир Макаров, Нам улууһун тыа хаһаайыстыбатыгар салалтатын салайааччы: «Былырыыҥҥы кыстыкка киирэрбитигэр 33 000 туонна от оттоммут эбит буоллаҕына, бүгүҥҥү күҥҥэ 12 000 туонна ордук оттоох олоробут. Олохтоох уонна кэлии эбиэс атыылыы турабыт, ону таһынан сайаапканан комбикорм. Быйылгы кыстык аһылык баар буолан этэҥҥэ ааһан эрэр».

Саха сирин үрдүнэн ынах маассабай төрөөһүнэ буола турар, бу ый бүтүөр диэри улахан аҥара барыта төрүөхтээх. Билигин хаһаайыстыбаларга уопсайа сэттэ тыһыынчаттан тахса ньирэй төрөөтө. Ааспыт сыл баччаларын кытта тэҥнээтэххэ төрөөһүн көрдөрүүтэ арыый аҕыйах. Күннэтэ төрөөһүн ахсаана эбиллэ турар.  Билигин саамай сүрүнэ хас биирдии төбө ахсаанын энчирэппэккэ этэҥҥэ кыстатан таһаарыы - сүрүн сыал-сорук.