Саха сиригэр Дойду Президенин быыбара ааста

170 сыл педагогическай ыстаастаах, Тулагы-Киллэм нэһилиэгин биир тарбахха баттанар ытык ыала Скырбыкиннар күн бүгүн бары биир күргүөмүнэн, Дойдубутугар сүгүрүйүүлэрин биллэрэннэр, эдэрдиин эмэнньиин сахалыы таҥастаах куоластарын биэрэ кэлбиттэр.  18 сааһын саҥа туолбут, сиэн уол Эрхан Хабаров бүгүн аан бастакытын куоластыыр, онон  дьиэ кэргэҥҥэ барытыгар бүгүн улахан суолталаах күн.

Любовь Скрыбыкина, РСФСР үөрэҕириитин туйгуна, СӨ үтүөлээх учуутала: «Бырааһынньык буоллаҕа, Президеммитин талар күммүт буолла. 2024 сыл Дьиэ кэргэн сылынан анаабыта Владимир Владимирович Путин. Ол иһин бу биһи бары дьиэ кэргэн буолан бары түмсэммит кэлэн быыбарга кытынныбыт».

Тустаах быыбардыыр учаастакка уопсайа 1436 киһи куоласатыыра бигэргэтиллэн турар. Быыбар бастакы күнүгэр хара сарсыардаттан дьон сэргэ төһө анньан кэлбиттэр. Аҥардас бастакы күн сарсыардатыгар номнуо 200 Тулагы олохтооҕо кэлэн блаанкаларын куоластыыр уурунаҕа бырахпыттар.  

Быыбар бастакы күнүгэр Өрөспүүбүлүкэбит Ил Дархана Айсен Николаев олорор сирин учаастагар - 33 оскуолаҕа кэлэн бэйэтин куолаһын биэрдэ. Айсен Сергеевич тоһоҕолоон эппитинэн Дойду Президенын быыбара - саамай суолталаах тэрээһин.

Айсен Николаев, СӨ Ил Дархана: «Дойдубут Президенин быыбара биһи дойдубутугар саамай улахан суолталаах. Биһиги хайаан да быыбарга кыттыахпытын наада. Бу быыбартан дойдубут кэлэр сылларга хайдах сайдара сүрдээх тутулуктаах уонна бүгүн биһи куоластааммыт бэйэбит сыһыаммытын көрдөрүөхпүтүн наада. Дойдубут күүстээх буоларыгар, мэлдьи сайда турарыгар биһи Сахабыт сирэ уонна Улуу Арассыыйа куруук кыаҕыра туралларыгар куоластыахпытын наада».

Быыбар 3 күнүн устата дьиҥннээх бырааһынньык тэҥэ буолла. Дьон-сэргэ санаата өрө күүрүүлээх кэлэн куоластаатылар. Саамай мааны, төрүт таҥастарын кэтэн кэлээччилэр кэлбит дьон санаатын көтөхтүлэр.

Оннооҕор Олоҥхоттон дьиҥ түһэн кэлбит курдук Дьулуруйар Ньургун Боотур Дойду Президенин быыбарыгар көхтөөх кыттыыны ылла. Бу курдук, куорат олохтоохторо гражданскай иэстэрин төлөөтүлэр.

Манна даҕатан эттэххэ, уопсайа Саха сирин үрдүнэн 811 куоластыыр учаастакатар үлэлээтилэр. Үгэс быһыытынан сарсыарда 8 чаастан, киэһээ аҕыска диэри дьон-норуот кэлэн Дойдубут инники кэскилин кэлэн түстээтилэр.