Дьокуускайга Масленица күннэрин бэлиэтээтилэр

Дьыл сырдык кэмин көрсүү үөрүүтүн үҥкүүтэ. Масленица кыттыылаахтара күн эргииринэн хоробуоту оройуттан туталлар. Үгэс быһыытынан маннык хамсаныыларга кыһыҥҥы киртэн-хохтон ыраастаныллар.  Дьокуускайга нуучча норуотун  түҥ былыргыттан илдьэ кэлбит бырааһынньыгын хас да сиринэн киэҥ хабааннаахтык бэлиэтээтилэр.

Масленица биир саамай тарҕаммыт үгэһэ - билиинчик. Онон норуот бырааһынньыгар мустубуттары хайаан да минньигэс, күн курдук төгүрүк блиныынан күндүлүүр сүрүн сиэр-туом.

Валентина Атласова: «Барыгытын бырааһынньыгынан эҕэрдэлиибин. Наһаа үчүгэйдик тэрийбиттэр. Атыы-кутуу бөҕөтө, ас-үөл».

Онон Эргэ куоракка көр-нар, күлүү-үөрүү көҕүлүттэн тутулунна.  Тэрээһиҥҥэ кэлбит хас биирдии киһи бэйэтигэр интэриэһинэйи булан көрдө.  Масленица куукулутын оҥоруу маастар - кылааһа үгүс дьону түмтэ. Уйгулаах дьыл кэлэрин, быйаҥнаах сайын үүнэрин баҕаран туран таҥас сыахайдары кэлбит ыалдьыттар оҥоһуннулар. Кинилэр илиитигэр талааннаах эдэр маастар ыйыытынан - кэрдиитинэн бэрт түргэнник бу курдук куукулалары баайан таһаардылар.  

Мария Острелина, маастар: «Куукула оҥорорго ириис кутабыт үүнүүлээҕэ им бэлиэтэ диэн».

Масленица улуу пост иннинээҕи нэдиэлэ  салҕанар бырааһынньык. Сэттэ күн устата хас биирдии дьиэҕэ билиинчик сыта дыргыйар.  Онтон нэдиэлэни түмүктүүр норуот күүлэйигэр омугуттан тутулуга суох көрү-нары көҕүлүттэн туталлар.

Альбина Захарова: «Нуучча бырааһынньыга буоллаҕа, ону сахалар үөрэнэммит сылдьар буолан эрэбит, интириэһиргиибит».

Бу күн норуот талааннаахтарын быыстапката көрдөрүүгэ турда, дьэрэкээн көстүүлээх куукулалары оҥоруу күрэҕэ тэрилиннэ. Маны сэргэ хас болуоссат аайы аралдьытар тэрээһиннэр ыытылыннылар. Манна норуот ырыаларыгар, частушкаҕа бастыҥары быһаардылар.

"Вдохновение" ансаамбыл Маҥан бөһүөлэгиттэн анаан-минээн бырааһынньыктааҕы тэрээһиннэргэ кытта кэлбит. Уонтан тахса сыл ыллыы-туойа сылдьар кэрэ аҥаардар сыллата сааһы көрсүү күрэхтэрин, кэнсиэрдэрин көтүппэттэр. Маннык гынан кинилэр норуот үгэстэрин, бэлиэ күннэрин ыччакка тириэрдэллэр, холобур буолаллар.

Виктория Кривошапкина, "Вдохновение" ансаамбыл кыттыылааҕа: «Наһаа үчүгэй бырааһынньык. Үөрэ-көтө кэллибит, дьоҥҥо барытыгар үчүгэйи баҕарабыт».

Ырыаны-тойугу сэргэ спортивнай күрэхтэһиилэр  олус көхтөөхтүк бардылар. Кыраҕы харахтаахтар күрэхтэригэр оҕолуун улаханныын илин - кэлин түһүстүлэр. Онтон обургу уолаттар күүстэрин холонон көрдүлэр.

Бу бэлиэ төһөнөн күүскэ күлэҕин-үөрэҕин, көхтөөхтүк кыттаҕын да дьылын оннук буолар диэн үгэс баар. Онтон норуот итэҕэлинэн масленица нэдиэлэтин кэннэ саас дьэ дьиҥнээхтии саҕаланар.