Үтүө санаа холобура
Главное
Көрбөттөр уопсастыбалара өр сыллар тухары күүппүт үөрүүлээх түгэннэрэ дьэ үүннэ. Саҥа дьиэлэрэ тутуллан, үлэҕэ киирэн малларын-салларын тиэйэн эрэллэр.
Николай Спиридонов, көрбөттөр куораттааҕы обществоларын бэрэссэдээтэлэ: «Саҥа дьиэбит спорт саалалаа, аактабай саалалаах. Онон спортивнай, култуурунай тэрээһиннэри ыытыыга усулуобуйа олохтонно».
Саҥа дьиэҕэ көһүү биллэн турар хайа баҕар киһи, тэрилтэ олоҕор улахан элбэх эппиэтинэһи эрэйэр тэрээһин. Күүһү-уоҕу ирдиир үлэҕэ амарах санаалаах устудьуоннар көрбөттөр уопсастыбаларын көрдөһүүлэринэн тутатына көмөлөһө кэллилэр.
Коля Коркин Арктикатааҕы судаарыстыбыннай агротехнологическай университет 2 кууруһун устудьуона. Устудьуоннар идэлээх сойуустарын олоҕор көхтөөх кыттыыны ылар. Кини сүрүннээн хаартыскаҕа уонна видеоҕа устуунан дьарыгырар. Иллэҥ кэмигэр дьоҥҥо-сэргэҕэ волонтер быһыытынан көмөлөһөр.
Николай Коркин, Арктикатааҕы судаарыстыбыннай агротехнологическай университет 2 кууруһун устудьуона: «Араас хабааннаах көмөнү оҥоробут. Үгүстүк ананл байыаннай дьайыы кыттыылаахтарын дьиэ кэргэттэригэр өйөбүлү оҥоробут. Онтон бу сырыыга мөлтөхтүк көрөр уопсастыба көһүүтүгэр көмөлөһө сылдьабыт».
Төһө даҕаны волонтер үлэтэ уустугун иһин, дьарыгын олус таптыыр. Холобур, бүгүн олус ыйааһыннаах тимир гиирэлэри, штангалары уонна улахан ыскааптары таһаллар. Үлэ харчы туһугар буолбакка киһи сүргэтин көтөҕөргө ис сүрэхтэн оҥоһуллар диэн устудьуон бэлиэтээн этэр.
Николай Коркин, Арктикатааҕы судаарыстыбыннай агротехнологическай университет 2 кууруһун устудьуона: «Бэйэм баҕаран туран волонтердуубун. Кырдьаҕас дьоҥҥо көмөлөһөн үтүө дьыаланы оҥоробун, биир санаалаахтарбын кытта билсэбин».
Волонтер идэлээх эдэр дьону ким даҕаны көлүйбэт. Бэйэлэрин баҕа санааларынан үтүө дьыала туһугар үлэлииллэр. Дьоҥҥо-сэргэҕэ, тулалыыр эйгэҕэ туһаны аҕалабыт диэн киэн тутта кэпсииргэ да үчүгэй.
Андрей Рева, Дьокуускайдааҕы уу транспорын институтун курсаана: «Дьоҥҥо үтүө дьыаланы оҥорор сыаллаах көмөҕө кэллибит».
Дьокуускай олохтоохторо көмөҕө наадыйар түгэннэригэр хайа баҕар үөрэх кыһатыгар биллиэхтэрин сөп. Холобур, бүгүн устудьуоннар ыарахантан чаҕыйбакка, түргэн тэтимнээхтик көрбөттөр уопсастыбаларыгар көмө буоллулар.
