Саха сирэ Гражданскай форумҥа 12 төгүлүн кытынна

Гражданскай форумҥа барыта биэс түһүлгэнэн 700 тахса кыттааччы муһунна. Дойду үрдүнэн турар сытыытык турар боппуруостарга араас дакылааттары, бырайыактары иһиттилэр.

Ньургуйаана Михайлова, Ньурба улууһун депутаттарын сэбиэтин бэрэссэдээтэлэ: «Саха сирин, бэйэбит олорор улуустарбыт инники сайдыытын торумун оҥордубут. Улуустан кэлбит делегациялар үгэс быһыытынан хас биирдии хайысхаҕа барытыгар кытталлар. Ол курдук биһиги улууспут хайа да тэрээһини көтүппэт. Көхтөөхтүк кыттар».

Саха Өрөспүүбүлүкэтин Бырабыытылыстыбата аҕыйах ахсааннаах норуоттар социокультурнай нэһилиэстибэлэрин харыстыыр уонна сайыннарар туһугар бырайыактары ылынна. Россия норуоттарын нэдиэлэтин, этнокултуурнай сайдыы туһунан конференциялары үөрэх кыһаларыгар ыытарга туруорустулар.

Ольга Григорьева, "Сделано в Якутии" урбаанньыттар түмсүүлэрин бэрэссэдээтэлэ: «Каадыры бэлэмнээһиҥҥэ, ыччаты дойдуга бэриниилээх буола улааталларын иитиигэ креативнай индустрия сабыдыала олус улаханын таарыйдыбыт. Бу хайысхаҕа РФ сокуона ылыллыытыгар биһиги өрөспүүбүлүкэбит биир бастакынан саҕалааччы буолан холобур буоллубут».

Өроөспүүбүлүкэ 10-тан тахса улуустара кыттыыны ыллылар. Санаа атастаһыытыттан ураты кэлбит ыалдьыттар Саха сиригэр оҥоһуллан тахсар бородууксуйа быыстапкатыгар сырыттылар. Саҥа саҕалаан иһэр урбаанньыттар уопуттаах бренд ааптардарын кытта хардарыта уопут атастастылар. Дойду сайдыытыгар ыччат дьон улахан кылааты уурарын актыыбынай кыттыыларынан бигэргэттилэр. Өрөспүүбүлүкэ сайдыытыгар кыттыан баҕалаах хас биирдии киһи санаата иһилиннэ.

Анисия Спиридонова, Кэбээйи улууһун ресурснай киинин салайааччыта: «Николай Арбузов секциятыгар сырыттыбыт. Грааны, бырайыагы хайдах сөптөөхтүк суруйууга элбэх саҥаны биллибит».

Быйылгы форум Россияҕа Дьиэ кэргэн сылыгар уонна Саха сиригэр Оҕо саас сылыгар ананна. Онон дойдуга бэриниилээх буолуу, култуураҕа, төрөөбүт төрүт тылга тапталы иҥэрии, оттон дьиэ кэргэн бөҕө тирэхтээх буолуутун тула кэпсэтии барда.