Гражданскай форумҥа төрүт үгэстэри ыччакка тириэрдии тула кэпсэтии таҕыста

Духуобунас, майгы-сигили, дьиэ кэргэн диэн тыллар 1993 сыллааҕы Россия конституциятыгар туттуллубатахтар эбит диэн, форум бастакы кыттыылааҕа дакылаатыгар иһитиннэрдэ. Онтон кэнники көннөрүүгэ иитиигэ сүрүн тирэх буолар тыллар киирбиттэрин бэлиэтээтэ, бу хайысхаҕа үлэ барарын ыйда. Итии курдук уустук боппуруоһу быһаарыыга хайаан да учуонайдар чинчийиилэригэр олоҕуруу ирдэнэр. Онон маҥнайгынан кинилэр санааларын истииттэн форум саҕаланна.

Айтал Яковлев, Гражданскай форум тэрийээччитэ, историческай наука кандидата: "Социологическай наука доктордара кэлэн Саха сиригэр Уһук Илиҥҥэ култуурнай- социальнай өттүнэн туох уларыйыы тахсарын ырытан уопсастыбаҕа таһаарыахтаахпыт, онно тирэҕирэн биһиги олохпут хайдах уларыйарын уонна сайдыахтааҕын көрөбүт".

Кэпсэтиигэ учуонайдары сэргэ общественнай түмсүүлэр, араас омук общиналара итиэннэ хас биирдии улуустан бэрэстэбиитэллэр кыттыыны ыллылар. Уруккаттан илдьэ кэлбит култуурабытын, төрүт үгэстэрбитин ыччакка хайдах сөптөөхтүк тириэрдэбитий, иҥэрэбитий диэн форум сүрүн соругар бэрт сэргэх кэпсэтии таҕыста. Үгүс ыйытыылар киирдилэр, санаа атастаһыыта барда. 

Надежда Зайкова, СӨ общественнай палататын чилиэнэ: "Билиҥҥи 21 үйэҕэ сыыппара кэмигэр култуурабыт, үгэспит хайдах киирэн биэриэхтээҕий ыччаты кытта үлэҕэ диэн боппуруос тула кэпсэтии барар".

Духуобунай иитии уонна төрүт сыаннастар былаһааккалара форум саамай үгүс киһини түмпүт салаатынан буолла. Ол курдук 80 тахса киһи кыттыыны ылла. Саха сиригэр олорор бары омуктар санааларын этиннилэр, холобура, итэҕэл боппуруоһа билиҥҥитэ ситэ кыайтара илигин бэлиэтээтилэр. Дьиэ кэргэн уонна Оҕос саас сылларын туһанан уопсастыба түмсүүлээх буолуутун ситиһиэхтээхпит диэн ыйдылар.

Мария Турантаева, СӨ култуура уонна духуобунай сайдыы минииистирин солбуйааччы: "Бу маннык кэпсэтиилэр түмүктэринэн биһиги инниктин хайдах сайдыахтаахпытын, ыччаппытын хайдах иитиэхтээхпитин торумнуубут. Маны сэргэ урбаанньыттар, дьон-сэргэ саламтаны кытары хайдах үлэлиэхтээҕин туһугар тэрээһин". 

Икки күннээх форум түмүгүнэн киэҥ хабааннаах резолюция ылыллан өрөспбүүбүлүкэ салалтатыгар бэриллиэҕэ, итиэннэ бу дөкүмүөн хас биирдии нэһилиэккэ тиийэ тарҕаныа.