Муома кыраайы үөрэтэр түмэлэ киин куоракка быыстапкалыыр

3 бырааттыы Соркомовтары кытта улуус историята быһаччы ситимнээх. Кинилэр хоту дойду сиригэр, Чиэрскэй хайалар арҕаа таастарын быыстарынан олохсуйбуттар.  Кинилэр  туттубут маллара-саллара, олохторун остуоруйатын быыстапка сиһилии көрөдөрөр.

Вера Тырылгина, быыстапка ыалдьыта: «Бу быыстапкаҕа өбүгэлэрбит хайдах тэринэн олорбуттарын көрөбүт. Бу эдэр көлүөнэҕэ наһаа наада».

Соркомовтар олохсуйан олорбут сирдэрэ күн бүгүнүгэр диэри турар, 3 балаҕан холлоҕосторо өссө даҕаны бүтүннэр диэн олохтоохтор икки ардыларыгар үһүйээн эрэ курдук кэпсэтиилэр бараллара. Маныаха былырыын Муома оройуонун кыраайы үөрэтэр түмэл үлэһиттэрэ анал экспедицияҕа айаннаабыттара. Ытык өтөҕү булан, экспонат хомуйан быыстапка тэрийэр сыаллаах-соруктаах айаҥҥа туруммуттара. Уустук айан түгэннэрин,  сыралаах үлэ хаартыскаларын, видеоларын ыалдьыттар быыстапкаҕа кэлэн көрүөхтэрин сөп.

Алёна Корякина, Муома оройуонун кыраайы үөрэтэр түмэл салайааччыта: «Сахалыы балаҕаннар хоту дойдуга баалларын көрөн олус диэн сөхпүппүт. Туох баар сиэри-туому тутуһан туран балаҕаҥҥа киирэн үөрэтиини саҕалаабыппыт».

Быыстапка арыллыытыгар сүрүннээн бырааттыылар удьуордара ыалдьыттаатылар. Бырааттыылартан биирдэстэрэ Гаврил Соркомов кыыһа - Анна Павлова. Күн бүгүнүгэр диэри өбүгэлэрин өйдүүр, күндүтүк  саныыр. Кини улуустааҕы музейы төрүттээччилэртэн биирдэстэрэ.

Анна Павлова, Гаврил Соркомов төрөппүт кыыһа: «Муома оройуонун кыраайы үөрэтэр музейын биһиги саҕалаабыппыт. Кылааһынан экспонат бөҕөтүн хомуйар этибит. Сайдввга, Соболооххо, Победаҕа сылдьан хомуйбуппут».

Емельян Ярославскай аатынан түмэлгэ быыстапка муус устар ортотугар диэри ыалдьыттары үөрэ көрсүөҕэ.