Биир күн 12 эбийиэк тэҥинэн үлэҕэ киирдэ
Тутуу - сайдыы төрүөтэ. Саха сиригэр кэнники сылларга дойдубут көҕүлээһининэн олоххо киирэр национальнай бырайыактар иилэринэн элбэх тутуу ыытыллар. Ол курдук аҥардас биэс сыл иһигэр 144 эбийиэк, олор истэригэр 37 оскуола, 24 оҕо саада, 60 медицинскэй уонна 6 спортивнай эбийиэк тутуллан үлэ5э киирдэ.
Айсен Николаев, СӨ Ил Дархана: "Бу өрөспүүбүлүкэбит, дойдубут тэтимнээхтик сайдыытын уонна дьон – сэргэ олоҕо тупсуутун дьиҥнээх холобура, туоһута буолар. Онон барыгытын итиитик – истиҥник эҕэрдэлиирбин көҥүллээҥ".
Ил Дархан Айсен Николаев биир күҥҥэ тэҥинэн өрөспүүбүлүкэбит араас улуустарыгар, хоту оройуоннарга тиийэ 12 социальнай уонна инфраструктурнай эбийиэги үөрүүлээх быһыыга-майгыга арыйда. Олор истэригэр Дьокуускайдааҕы 26 нүөмэрдээх оскуола эбии дьиэтин аһыы киирдэ. Оскуолаҕа бэлиэ түгэҥҥэ үрдүкү кылаас үөрэнээччилэрэ ох курдук оҥостон учууталларын кытта долгуйа бэлэмнэнэр түбүккэ сылдаллар.
Денис Кузьмин, Дьокуускайдааҕы 26 №-дээх оскуола 10 кылааһын үөрэнээччитэ: "Саҥа оборудование бөҕө кэлбит. Холобура, физика уруогар уопут оҥорууга сөптөөх араас тэрил баар буолбут. Остолобуой олус үчүгэй".
26 нүөмэрдээх оскуола куорат, өрөспүүбүлүкэ биир саамай бөдөҥ оскуолатын иһигэр киирсэр. Манна бүгүҥҥү күҥҥэ икки тыһыынча кэриҥэ оҕо үөрэнэр. Онон оскуола эбии дьиэтин тутуу боппуруоһа турбута. Маныаха “Үөрэҕирии” национальнай бырайык чэрчитинэн кыһалҕа быһаарыллан, оскуола эбии дьиэтэ үлэҕэ киирдэ. Саҥа тутуу үс этээстээх, 4 тыһыынчаттан тахса квадратнай миэтэрэ иэннээх, 315 миэстэҕэ анаммыт. Манна 9,10,11 кылаас оҕолоро үөрэниэхтэрэ.
Гаврил Филиппов, Дьокуускайдааҕы 26 №-дээх оскуола дириэктэрин солбуйааччы: "Саҥа дьиэ усулуобуйата үрдүк таһымнаах. Бары ирдэбилгэ толору эппиэттиир толору хааччыллыылаах. Үөрэнэр кылаастар буоллуннар, лабараан хоһо буоллун, спорт саалата барыта үрдүк таһымнаах".
Бу курдук биир тэҥинэн өрөспүүбүлүкэбит араас муннугар Дьокуускайтан саҕалаан Муомаҕа, Чокуурдаахха тиийэ бэрт суолталаах саҥа тутуулар аһылыннылар. Аҥаардас Чурапчы улууһун киинигэр үс саҥа эбийиэги, ол курдук улуустааҕы библиотеканы, спортивнай комплексы, балыыһаны үөрүүлээх быһыыга-майгыга арыйдылар.
Николай Сивцев, Чурапчытааҕы кииннэммит балыыһа кылаабынай бырааһа: "Кэтэһиилээх балыыһабыт бастакы этээһэ поликлиника буолар. Манна улахан дьон көрдөрүнүөхтэрэ. Онтон иккис этээскэ тиис быраастара, оҕо салаата, күнүскү сытар балыыһа, чөлүгэр түһэрии киинэ баар буолуоҕа, оттон үһүс этээскэ 23 куойка миэстэлээх терапия салаатын оҥордубут".
Национальнай бырайыактар эбии салҕанан барыахтара, ол чэрчитинэн дьон олоҕун таһымын үрдэтиигэ үп-харчы көрүллэн олорор дьиэлэр, социальнай, үөрэх, спорт эйгэтин эбийиэктэрэ дьэндэйиэхтэрэ.
