17 улуус саҥа оптуобус күлүүһүн тутта

Сабыс саҥа көлөнү сыныйан көрүү. Улуус бэрэстэбиитэллэрэ уонна  суоппар хас биирдии кнопканы баттаан, уопсайынан барытын илиилэринэн тутан-хабан көрөллөр. Газель некст сити диэн дьоҕус оптуобус Бэрдьигэстээххэ сонун көлө буолуоҕа. Бөһүөлэк иһигэр дьону - тиэйиигэ маннык тупсаҕай оҥоһуулаах, киэҥ-куоҥ сырдык көлө аан маҥнайгытын баар буолла. Суоппар Андрей Осипов исписэлиис быһыытынан маҥнайгы көрүүгэ хайҕабыл сыанабылы быста.

Андрей Осипов, суоппар: "Дьоҕус эбит. Онто биһиэхэ ордук табыгастаах, күнүскү өттүгэр дьон аҕыйыыр".

Уопсайа барыта 53 оптуобус кэллэ. Көлөлөр үс араастар.  Ол курдук Павлоскайдааҕы автобус собуотуттан, газель некст сити диэн дьоҕус массыына итиэннэ Курганнааҕы собуот таҥыыта.  Ил Дархан Айсен Николаев 7 улууска күлүүстэри туттарар. Сунтаар улууһа саамай улахан күлүүс сибээскэтин ылла, ол курдук биэс оптуобус кинилэргэ бэрилиннэ. 

Николай Александров, Сунтаар улууһун баһылыгын бастакы солбуйааччыта: "Биһиги үс улахан уонна икки кыра оптуобус күлүүһүн туттубут. Бу көлөлөрү Сунтаар улууһун нэһилиэктэрин икки ардыгар сүүрдүөхпүт".

Бу оптуобустар федеральнай бырайыак чэрчитинэн ылылыннылар. Уопсай үбүлээһин 400 мөлүйүөн солкуобай. Саҥа көлөнү барыта 17 оройуон ылыаҕа. Ол курдук Халыма улуустарыттан саҕалаан киин, соҕуруу улуустарга тиийэ оптуобус бэлэх тутуохтара.  Көлөлөр өрөспүүбүлүкэ анал сакааһынан таҥыллыбыт буоланнар Саха сирин тыйыс усулуобуйатыгар сөп түбэһэллэр. 

Холобура, бу Кэбээйи улууһугар барыахтаах оптуобус. Суоппар бастатан туран көлө сылаас буолсу диэн бэлиэтиир уонна кэлээскэлээх киһи киирэригэр аллараа түһэн биэрэрин сонурҕуу кэпсиир.  Бу улахан оптуобустар сүрүннээн нэһилиэктэр икии ардыларыгар нэһилинньэни тиэйиигэ-таһыыга туһулаан сүүрүөхтэрэ.

Степан Капитонов, Горнай улууһун ресурснай киинин салайааччыта: "Улахан оптуобустарбыт кэллэхтэринэ нэһилиэктэр икки ардыларыгар маршрут оҥоруохпут. Ону сэргэ Дьокуускайга эмиэ сырыыны олохтууру ситиһиэхпит".

53 оптуобус барыта саха сиригэр кэлбит, муус суола сабыллыар диэри анаммыт сирдэригэр тиийиэхтэрэ. Онтон быйыл Дьокуускай куоракка 45 саҥа оптуобус кэлиэҕэ.