Кыстык этэҥҥэ, от тиийэр

Төрүөх кэмэ саҕаланан Ньурба улууһун Дьаарханын Васильевтар тэрээһиннээх хаһаайыстыбаларыгар үрүҥ илгэ үрүйэлии устар. Хаһаайыстыба тутаах үлэһитэ Алена Слепцова ыам түбүгэр түспүт. Билигин номнуо үүтү туттаран саҕалаабыттар,  күннэтэ киэһээ сарсыарда ыаныллан 40 лиитэрэ  үрүҥ илгэ туттарыллар.

Алёна Слепцова, хаһаайыстыба үлэһитэ: "Ынахтарбыт төрөөн эрэллэр. Билигин алта ньирэйдээхпит. Аны уонтан тахса уулаах ынах баар".

Күн бүгүн тэрээһиннээх хаһаайыстыбаҕа 58 төбө хороҕор муостаах кыстыгы этэҥҥэ туораан эрэр. Манна кэргэннии Алена уонна Дмитрий иккиэн биир күргүөмүнэн үлэлииллэр. От тиийэр буолан быйылгы кыһыны туох да мэһэйэ, күчүмэҕэйэ суох туораан эрэллэриттэн үлэһиттэр үөрэллэр.

Дмитрий Мокрощупов, хаһаайыстыба үлэһитэ: "Быйыл кыстык олох үчүгэй. Былырыын ардаҕа суохха оттоммут буолан оппут күөх".

Маныаха кыстыгы этэҥҥэ туорааһын үлэ хаамыытыттан улахан тутулуктаах. Хаһаайыстыба бу хайысхаҕа улахан болҕомтону уурар. Манна үлэһиттэргэ үчүгэй усулуобуйа тэриллэр.

Альберт Васильев, хаһаайыстыба салайааччыта: "Ууну ыраастыыр систиэмэ туруорбуппут. Онон сүөһүлэрбит ыраас ууну иһэллэр. Маны тэҥэ үүт тымнытар тэриллээхпит".

Оттон манна даҕатан эттэххэ, өрөспүүбүлүкэ үрдүнэн кыстык этэҥҥэ. Оперативнай дааннай көрдөрөрүнэн, билигин  8,500 тахса ньирэй төрөөн турар. Хаһаайыстыбалар бары эбии аһылыкка киирбиттэр.