Дьокуускайга "Абилимпикс" идэ маастарыстыбатын регионнааҕы чемпионата аһылынна

Мөлтөхтүк истэр оҕолор өрөспүүбүлүкэтээҕи коррекционнай оскуолатын 12 кылааһын үөрэнээччитэ Сахаайа Попова "Ногтевой сервис" диэн былырыын саҥа киирбит хайысхаҕа номнуо иккс сылын холонон көрөргө сананан, эрдэттэн үөрэнэн кыттар.

Сахаайа Попова, күрэхтэһии кыттыылааҕа: “14 сааспыттан тыҥырах оҥорон саҕалаабытым. Онон бу хайысханы олус диэн сөбүлүүбүн. Ситиһиилэрдээхпин”.

Доруобуйаларыгар хааччахтаах дьон идэни баһылаабыт маастарыстыбаларын тургутар күрэх Саха сиригэр 9 төгүлүн ыытыллар.  Саастарынан 3 бөлөххө арахсан, ол курдук оскуола үөрэнээччилэрэ, устудьуоннар уонна үлэлии сылдьар исписэлиистэр барыта уонунан  хайысханан үөрүйэхтэрин көрдөрүөхтэрэ. 

Туйаара Степанова, "Медицинскэй уонна лабораторнай анализ" компетенция сүрүн эксперэ: "Биһиги бу күрэххэ 2019 сыллаахтан кыттабыт. Национальнай чемпионакка уопсайа биэс мэтээллээхпит. Онтон мин бэйэм компетенциябар икки мэтээллээхпин".

Дьокуускайдааҕы медицинэ коллеһа "Абилимпикс" күрэхтэһиини 2019 сыллаахтан ыытар. Быйыл номнуо 5 сылын чемпионат сүрүн былассааккатын быһыытынан үлэлиир. Үөрэх кыһатыгар бүгүҥҥү күҥҥэ икки тыһыынчаттан тахса устудьуон үөрэнэр, онтон  33 инбэлиитинэстээх.

Александра Новикова, Дьокуускайдааҕы медицинэ коллеһын дириэктэрин солбуйааччы: "Оскуола оҕолоруга, устудьуоннарга уонна исписэлиистэргэ ыытабыт. Барыта алта хайысхаҕа арахсан күрэх барар. Бу чемпионат оҕолор инники идэлэрин сөпкө талалларыгар көмөлөһөр".

Онон "Абилимпикс" тэрээһинэ инбэлиит дьоҥҥо идэ ылалларыгар, үлэ булалларыгар төһүү буолар. Медицинэ коллеһыгар кэлбит ыалдьыттарга, кыттааччыларга анаан маастар-кылаастары, көрдөрдүлэр, иҥэмтиэлээх утахтары амсаттылар.

Юлена Попова, Дьокуускайдааҕы медицинэ коллеһын устудьуона: "Иммунитеты көтөҕөр утахпыт дөлүһүөн уонна солодка эбииликтээх.Сааскы кэмҥэ доруобуйаны бөҕөргөтүүгэ барсар".

Саха сиригэр "Абилимпикс" регионнааҕы Чемпионатыгар уопсайа 260 доруобуйаларыгар хааччахтаах оскуола үөрэнээччитэ, устудьуон, исписэлиис бу күннэртэн кыттан саҕалыаҕа. Күрэхтэһии бу ый бүтүөр диэри 12 араас үөрэх кыһаларыгар ыытыллар.

Захар Данилов, Дьокуускайдааҕы медицинэ коллеһын устудьуона: "Оскуолаҕа оҕолоро пластилинынан тиис моһуонун оҥоруохтаахтар. Ким ордук майгыннаппыт, биллэн турар, кыайар итиэннэ салгыы күрэхтэргэ барар".

Чемпионат кулун тутар 31 күнүгэр диэри ыытыллыаҕа. Күрэхтэһээччилэри экспердэр уонна үлэ биэрээччилэр сыаналыахтара. Түмүккэ кыайыылаахтар финалга киирэн, Россияҕа баран идэлэрин маастарыстыбатын, үөрүйэхтэрин бүтүн дойду таһымыгар үрдэтиэхтэрэ, итиэннэ аан бастакытын тустаах сертификат тутуохтара.