Аныгыс нэдиэлэҕэ халлаан сылыйыа

Күнү-дьылы кэтээччилэр сылыктыылларынан мантан ыла салгын температурата күнүһүн ортотунан 10 кыраадыс  тымныыны көрдөрүөҕэ, ол эрэн түүнүн  27 кыраадыска тиийэ тымныйыаҕа. Онон бу күннэртэн ыла салгын температурата күүскэ халбаҥнаан, мууспут, хаарбыт кыра-кыралаан ирэн саҕалыа. Итиэннэ саас аайы буолар халтараан эмиэ бэйэтин биллэрэн эрэр. Онтон аныгыс нэдиэлэттэн 5 кыраадыска тиийэ тахсара күүтүллэр.

Билигин дьон хаҥкылыыр, сырылыыр сирдэргэ  ордук эчэйэр. Ону таһынан кэмигэр ыраастамматах суолларга халтарыйан балыыһаҕа көрдөрүү элбээтэ.

Саас кэлиитэ Дьокуускай куорат олохтоохторугар биир ыарахан кэм. Сыллата буолар айылҕа биир көстүүтэ өрүүтүн буоларын курдук нэһилиэнньэ бары араҥатын долгутар. Суол кытыытынан дьон хаамар сирэ мууһунан бүрүллүүтэ - киһи олоҕор кутталы үөскэтэр. Ол эрэн, суол туругун ордорооччулар да сэмэлээччилэр да бааллар.

Халтырхай суол тимир көлөлөөхтөрү эмиэ тумнубат. Аҥаардас ааспыт нэдиэлэ түмүгүнэн Саха сирин үрдүнэн 60-ча суол саахала таҕыста. Онтон бу ааспыт өрөбүллэргэ киһи өлүүлээх түгэннэр да бааллар.

Владимир Ощепков, : «Бу кулун тутар 9 күнүгэп Уус Майа улууһугар тахсыбыт суол саахалыгар сатыы киһи суорума суолланна. 1992 сыллаах төрүөх киһи Уус Майа уонна Петропавлоскай икки ардыгар суол кытыытынан хааман испит киһини түҥнэри көппүт». 

Онон мантан саас күүстээх ириэриилэр кэллэхтэринэ суол-иис туруга өссө мөлтүө турдаҕа. Оччоҕо сатыы да сылдьааччылартан, тимир да көлөлөөхтөртөн үрдүкү болҕомто, сэрэхтээх сыһыан ирдэнэрин гибдд инспектордара санаталлар.