Удьаа, көҥкөлөй оҥорууга маастардар күрэхтэстилэр

Быйылгы сылга норуот маастардарын уонна саҥа саҕалааччылар ортолоругар ыытыллар идэ таһымын үрдэтэр күрэх удьаа, көҥкөлөй төрүт иһиттэри оҥорууга ананна.  Сунтаар Тойбохойуттан кэлэ сылдьар Анатолий Семенов уолунаан Сашалыын кымыс иһитин оҥорууга холонон көрдүлэр. 

Анатолий Семёнов, күрэх кыттыылааҕа, Сунтаар улууһа: "Оҥорон бэлэмнээн аҕалбыппыт. Онтон манна оһуорун кыстыбыт".

Александр Семёнов, күрэх кыттыылааҕа: "Аҕабар тутан биэрэн көмөлөстүм. Ону таһынан ааллым, кырааскаластым".

Тэрээһиҥҥэ барыта 10 маастар Сунтаартан, Мирнэйтэн, Тааттаттан, Мэҥэ- Хаҥаластан, Намтан  кытыннылар.

Руслан Захаров, уус-уран оҥоһук маастара, Нам улууһа: "Маннык күрэх хайаан да наада. Тургутууну ааһан, уопутуран оҕолору үөрэтэргэ байытынаҕын".

Быйылгы күрэххэ маастардар оҕолорун кытта кыттыбыттара хайҕаллаах. Мэҥэ-Хаҥаластан Баишевтар дьиэ кэргэн маастарыстыбаларын тургуттулар. 

Елисей Баишев, күрэх кыттыылааҕа: "Тимиринэн уһанабын, ону сэргэ бу маска эмиэ холонобун".

Түмүккэ бу күрэххэ норуот маастара Федор Чээрин кыайыыны ситистэ. Кыайыылахтар үлэлэрэ Симэх фондатыгар хараллыаҕа. 

Дмитрий Осипов, "Симэх" норуот искусствотын уонна уус-уран оҥоһуктарын национальнай киинин салаатын салайааччы: "Үс саамай бастыҥ үлэ “Симэх” пуондатыгар үйэ саас тухары хараллыыга киириэхтэрэ. Маастардар ааттара үйэтитиллиэ".

Маны тэҥэ,хотугу иистэнньэҥнэр ортолоругар Дэрбэкэ диэн төбө киэргэлин оҥоруу күрэҕэ буолла. Томпо улууһун Тополиное нэһилиэгиттэн сылдьар Антонина Левина үйэтин тухары табаһыттар таҥастарын тигиигэ үлэлэспитэ.

Антонина Левина, күрэх кыттыылааҕа, Томпо улууһа: "Таба тириитэ сарыыттан бастыҥа. Күрэх ирдэбилинэн биир да сиик көстүө суохтаах".

Манна Эдьигээн, Булуҥ, Кэбээйи, Үөһээ Халыма улуустарын уран тарбахтаахтара айылҕа матырыйаалыттан киэргэл оҥордулар.

Валентина Акимова, ХИФУ доцена: "Холобура балык хатырыгыттан, уҥуоҕуттан бэргэһэҕэ тиийэ оҥороллор".

Маннык күрэхтэри маастардары көҕүлүүр, эдэрдэри айар идэҕэ сыһыарар сыаллаах сыллата тэрийэллэр.