Саха сиригэр таҥыллар вездеходу анал байыаннай дьайыыга ыыттылар

Тоҥ хаары тоҕута кэһэн "Бэргэн" вездеход тургутууну ааһар. Сахабыт сирин мындыр өйдөөхтөрө, талба талаанаахтара таҥан таһаарбыт модьу тиэхиникэлэрин киһи көрдө эрэ тутатына сэргиир-сэҥээрэр. Саха сатаабата суох диэбиттэринии бу ураты оҥоһуулаах тэрили саха уолаттара оҥорон таһаарбыттар.

Егор Абрамов,"Бэргэн" вездеходтары оҥорор хампаанньа үлэһитэ: "Бу массыына уруула гидравлика буолан олус сымнаҕас".

Хас биирдии оҥоһуллубут массыынаны бу курдук таһырдьа таһааран сүүрдэн-көтүтэн көрөллөр. Итэҕэс-быһаҕас баарын тутатына суох оҥороллор. Саҥа оҥоһуллубут вездеход бэйэтин үтүө эрэ өрүтүттэн көрдөрөр.

"Бэргэн" вездеходка алта киһи батан айанныан сөп. Массыына 5 ускуорастаах, 90-100км\ч айанныыр кыайтаах.

Сыах иһигэр киирдэххэ үлэ күөстүү оргуйар. Ким тимири уһаарар, ким кэккэ саппаас чаастары бэрийэр. Бу манна баар дьон туохтан да чаҕыйбакка үлэ арааһын аҥаар кырыытыттан ылсан барыны бары сатыыр, массынаны таҥыы бары түһүмэҕэр кыттыһаллар. Ол чаҕылхай холобурунан Егор Абрамов буолар. Үөрэн-көтөн, сүргэтэ өрө көтөҕүллэн үлэ күнэ биллибэккэ ааһар.

Егор Абрамов, "Бэргэн" вездеходтары оҥорор хампаанньа үлэһитэ: "Эрдэ хонтуора үлэтигэр үлэлээбитим. Онтон билиҥҥи дьарыкпын олус диэн сөбүлүүбүн. Өрөбүллэргэ кытта үлэлиибин".

Хампаанньа 2018 сыллаахтан үлэтин саҕалаабыта. Ол кэмтэн ыла араас вездеходтары оҥорон таһаарда. Саамай табыгастааҕынан, дьон наадыйарынан "Бэргэн" вездеход буолла, онон бу бүтэһик 3 сыл устата номнуо дьоҕус тэрилтэ 28 массыынаны оҥорон таһаарда. Ону таһынан бу күннэргэ анал байыаннай дьайыыга 2 массыынаны боруобаҕа ыытта.

Евгений Николаев,  "БэргэнМото" хампаанньа тэрийээччитэ: "Икки массыынаны анал байыаннай дьайыыга ыыттыбыт. Арыый да уларыттыбыт,холобура, уотун-күөһүн".

Аны бу вездеход бэйэтин кыаҕын, сатабылын анал байыаннай дьайыы буола турар сиригэр көрдөрдөҕүнэ, сэҥээриини ыллаҕына тэрилтэ үлэлиир кыамтатын үрдэтэн, оҥорон таһаарыытын элбэтэн анал байыаннай дьайыы кыттыылаахтарыгар ыытыахтара.