Роман Дмитриев аатынан турнирга Саха сирэ икки кыһын көмүс мэтээллээх

"Өрөгөй" успуорт комплексын уораҕайа ыһыынан-хаһыынан туолан турар. Бүгүн улуу спортсмен Роман Дмитриев аатынан көҥүл тустууга күрэс тиһэх күнэ.

Семён Чердонов, Р.М. Дмитриев аатынан Олимпийскай эрэллэр училище дириэктэрэ: «12 тас дойдуттан уонна Россия 26 регионуттан кэлэн кытта сылдьаллар».

Имам Умаров бүгүҥҥү күҥҥэ кыайыы минньигэс амтанын биллэ. 61 киилэ ыйааһыннаах бөҕөстөр икки ардыларыгар бэйэтигэр тэҥнээҕин булбата. Эдэр спортсмен Саха Саха сиригэр номнуо иккис сырыыта.

Имам Умаров, 61 киилэҕэ Р.М. Дмитриев турнирын кыайыылааҕа: «Бары кыайыы иһин кииристилэр, утарсааччыларым бары үрдүк таһымнаахтар. Бэртээхэй турнир, чаҕылхай спортсменнар түмсүбүттэр».

Көрөөччүлэр биллэн турар биир дойдулаахтарыгар ыалдьаллар. Күрэх таһымын, кыттааччылар бэлэмнэрин бэрт сэргээн көрөллөр, санааларын үллэстэллэр.

Бүгүҥҥү күн сулуһунан Роман Николаев буолла. Көбүөргэ бэйэтин ахсааныгар 11 балы хомунан утарсааччытын Абдулмуслим Абдулмуслимовы эрэллээхтик кыайда. Кыһыл көмүс мэтээли түөһүгэр иилиннэ.

Былырыыҥҥы күрэххэ иккис миэстэ буолбут эбит буоллаҕына, быйыл дьарыгын өссө күүһүрдэн көбүөргэ кыайыыга эрэллээх киирбитим диэн бигэргэтэр.

Роман Николаев, 79 киилэҕэ Р.М. Дмитриев турнирын кыайыылааҕа: «Былырыын Роман Дмитриев турнирыгар кыайтарбытым, Коркин киэнигэр эмиэ. Онтон быйыл финалга тахсаммын эрэллээхтик кыайдым».

Саха тустуута инникилээҕин, маҥнайгы олимпийскай чөмпүйүөн Роман Дмитриев туйаҕын хатарар кыахтаах эдэр бөҕөстөр баалларын X төгүлүн ыытыллар турнир бигэргэттэ. Холобур күрэх иккис күнүгэр Лев Павлов иккис төгүлүн чулуу спортсмен аатынан ыытыллар күрэххэ кыайыы өрөгөйүн туппута.