Роман Дмитриев төрөөбүтэ 75 сылыгар анаан араас тэрээһиннэр ыытыллаллар

Роман Дмитриев күн сирин көрбүтэ 75 сыла кулун тутар 7-с күнүгэр бэлиэтэнэр. Ил Дархан уурааҕын чэрчитинэн кулун тутар 5 күнүттэн 11-гэр диэри олимпийскай чемпион аатын үйэтитиигэ туһаайыллыбыт тэрээһиннэр ыытыллаллар. Бастакынан "Мои тетради" диэн кинигэ сүрэхтэннэ. Роман Михайлович бэйэтин буочарынан суруллубут олоҕун олуктара үтүө холобур буолуохтара диэн кинигэ бэчээттэниитигэр кыттыгастаах дьон бигэ эрэллээхтэр.

Родион Федоров, Роман Дмитриев аатын үйэтитэр сэбиэт бэрэссэдээтэлэ: «Саамай сүрүн тиэмэтэ – улахан олимпиада чыпчаалыгар тахсыбыт киһи хайдах иитиллибитий? Олоҕу хайдах кыра эрдэҕиттэн көрөр-истэр эбитий. Ону Роман Михайлович наһаа үчүгэйдик суруйбут».

Роман Дмитриев - чаҕылхай көҥүл тустуу сулуһа, сахалартан маҥнайгы олимпийскай чөмпүйүөн, Саха Сирин бүтүн аан дойдуга аатырдыбыт маҥнайгы тустуук. 1972 сыллаахха Мюнхен куоракка 20-с олимпийскай оонньууларга кыһыл көмүс мэтээлинэн наҕараадаланан норуот историятыгар улахан кылааты киллэрбитэ, саха спортсменнарыгар суолу солообута. Спорт номоҕо буолбут улуу киһибитигэр анаан Ил Түмэҥҥэ ыытыллыбыт төгүрүк остуолга кинини ахтан-санаан аастылар.

Роман Степанов, Роман Дмитриев бииргэ үөрэммит доҕоро: «Саха сирин аатырдыбыт спортсмен буолбакка, дьиннээх киһи быһыытынан үчүгэй майгылааҕа, иитиилээҕэ чөмпүйүөн буоларыгар улаханнык көмөлөспүтэ».

Кэпсэтиигэ спорт эйгэтин, бырабыытылыстыба үлэһиттэрэ, ааттаах-суоллаах спортсменнар, Роман Дмитриев биир дойдулаахтара уонна доҕотторо кыттыыны ыллылар. Роман Дмитриев үтүө аатын үйэтитиигэ ыытыллар үлэлэр тустарынан дьүүллэстилэр. Сүрүн болҕомтону спортсмен төрөөбүт сиригэр-уотугар Эдьигээн улууһугар уурдубут диэн бэлиэтээн этэллэр.

Сергей Местников, СӨ Бырабыыталыстыбатын бэрэссэдээтэлин солбуйааччыта: «Култуура киинэ тутуллан түмүктэнэн эрэр. Ону таһынан быйыл сыл бүтүүтэ спорткомплекс тутуллан киириэҕэ. Ол эбийиэккэ Роман Михайлович Дмитриев аата иҥэриллиэҕэ».

Бүгүн улуу спортсмен төрөөбүт күнэ. Комсомол болуоссатыгар Роман Дмитриев пааматынньыгар үөрүүлээх быһыыга-майгыга сибэкки дьөрбөтүн ууруохтара. Маны таһынан Суорун Омоллоон аатынан Опера уонна балет тыйаатырын сыанатыгар олимпийскай чемпион туһунан "Сулус буолан умайдын" диэн испэктээкили көрдөрүөхтэрэ.