Өлүөнэ очуостарыгар аан маҥнайгытын муус паарката оҥоһулунна

Дойду кэрэхсэнэр сиригэр аан бастакытын муус паарката оҥоһулунна. Кулун тутар 19 күнүгэр ытык турууктарга 8-с аан дойдутааҕы «Азия оҕолоро» оонньууларын төлөнүн уматыахтара. Ол тиэмэтигэр Өрөспүүбүлүкэ бастыҥ муус уустара күрэхтэстилэр, 5 күн иһигэр Өлүөнэ эбэ ыраас мууһуттан араас оҥоһуктары чочуйан таһаардылар. 10 бастыҥ уустар иһигэр киирбит дьон кыайыы иһин буолбакка, ытык сиргэ ыалдьыттаан, айылҕалыын алтыһан барар туһугар сүргэлэрэ көтөҕүлүннэ.

Оттон кыайыылааҕынан Хатас нэһилиэгиттэн сылдьар Максим Охлопков уонна Семён Баянаков буоллулар.

Максим Охлопков, "Начало побед" муус бэстибээлин кыайыылааҕа: «Бу бириэмэ нөҥүө оҕунан кыайыыга ыппыт оҕолору оҥордубут».

Семён Баянаков, "Начало побед" муус бэстибээлин кыайыылааҕа: «Манна эйгэтэ олус атын бу хайалары көрөн туран».

Саха сирин туризма Аан дойду таһымыгар бастакы улахан хардыылары оҥорор. Баай устуоруйаны, айылҕа күүһүн кэрэһэлиир ытык очуостарга сылдьыан баҕалаах киһи үгүс. Күнүнэн тиийэр туристарга иттэр дьиэ, сылаас астаах кафе, оннооҕор хаартыскаҕа түһэргэ саха төрүт сылаас таҥаһа кытары баар. Онон туох баар киһи наадыйара барыта оҥоһуллан, дьон сырыыта элбиирэ күүтүллэр.

Очуостарга тахсар кирилиэс устата 9-та тохтоон сынньанар уонна хаартыскаҕа түһэр сир оҥоһуллуоҕа. Киэһээҥҥи кэмҥэ тахсар ыллык дьон тахсарыгар кутталы үөскэппэт туһугар уотунан сырдатыллыаҕа.

Дмитрий Громов, "Ленские столбы" национальнай парк дириэктэрин солбуйааччыта: «Урут биир эрэ ыллык баар буоллаҕына, билигин 3 араас ыллык баар буолар. Бастакы көрүү өттүгэр мас ыллык баар буолар. Иккис үлтүркэй таас күүлэйдиир сиргэ. Уонна Лабыдьаҕа эрэ үүнэр эндемик үүнээйилэри көрөргө туспа тимир эко-ыллык баар буолар, сиртэн 30-50 см. үрдүккэ».

Маны таһынан киһи тохтоон-өрөөн ааһарыгар аналлаах сынньалаҥ комплекса тутуллан үлэлиир. Элбэх малы соспокко, бу дьиэттэн киһи туттарыгар наадалааҕы барытын булуохха сөп. Миэстэтигэр аһыыр сирдээх, бааньыктаах уонна иллэҥ кэми туһалаахтык атаарар сирдээх. Дьиэ хаһаайката Хаҥалас улууһа уонна Өрөспүүбүлүкэ граныгар кыайан бу комплексын кэҥэтэргэ үлэни ыытар.

Надежда Сыромятникова, "Арматурз" дириэктэрин солбуйааччыта: «Хас биирдии Саха сирин киһитэ, Арассыыйа олохтоохторо, аан дойдуттан кэлэн кэрэхсэбиллээх сири көрөн аастыннар диэн сыаллаах-соруктаах үлэлии сылдьабыт».

Киэһээҥҥи өттүгэр Өлүөнэ очуостара уотунан сырдатыллар буолла. Бу көстөр уокка өссө эбии дьүһүн эбиллэн, үгүс киһи болҕомтотун сүйээрэ күүтүллэр. Саха сирэ киэн туттар очуостара ыалдьыттарын күүтэр.