Уус-Алдан оскуола үөрэнээччилэрэ кыһыннары клубника олордоллор

Суотту орто оскуолатын үөрэнээччитэ Эмма Егорова ааспыт сылтан дьэдьэни үүннэриини чинчийэр. Минньигэс отон олордуутуттан саҕалаан аһын биэриэр диэри бүөбэйдиир, кэтээн көрөр. Үүнээйи тыынар тыыннаах буолан көрүүнү-истиини эрэйэр диэн этэр.

Эмма Егорова, Суотту орто оскуолатын 10 кылааһын үөрэнээччитэ: «Хас биирдии үүнээйи ыарыылаах буолуон сөп, үөннэр сымыыттара игин баар буолуон сөп, ол иһин сотору-сотору сэбирдэхтэрин микроскопическай анаалыһын оҥоробут. Ыарыы баар буолар түгэнигэр биһиги анал препараттарынан, фунгицидтарынан, акарицидтарынан үүнээйилэрбитин эмтиибит уонна салгыы кэтээн барабыт».

Суотту орто оскуолатын иһинэн ааспыт сылтан «АгроНул» диэн үөрэх киинэ үлэлиир. Манна биотехнология лабораториятыгар клубниканы олордоллор. Уһуйааччы Николай Котоконов, бэйэтэ бырайыак ааптара. Үөрэнээччилэргэ минньигэс отону олордуу кистэлэҥнэрин арыйар. Аан бастаан «Мальго» диэн суорду олордубуттар, оттон билигин атыҥҥа көспүттэр. Уопсайынан сыллата суортарын эксперимент быһыытынан уларыта сылдьаллар.

Николай Котоконов, Суотту орто оскуолатын эбии үөрэхтээһиҥҥэ уһуйааччыта: «Былырыҥҥыттааҕар быдан миннигэс эрээри кыракый эбит. Суортарын үөрэтээһин сыллата барар, тоҕо диэтэххэ суорт аайы туспа тиһик буолуохтаах. Аһатыыта игин атын буолар, ол иһин элбэх суорту бииргэ олордор көрүллүбэт, ол эрэн биир суортка үчүгэй ньыманы көрдүүргэ олордуохха сэп».

Тустаах лабораторияҕа хас биирдии үүнээйигэ сөптөөх усулуобуйа олохтоммут. Дьэдьэннэр сырдыгынан хааччыллыылаахтар уонна эбии аһылыкка тураллар. Онон Суотту орто оскуолата биир уктан биир киилэҕэ тиийэ клубниканы хомуйар. Билигин минньигэс отон ситэн эрэр, аны аҕыйах күнүнэн кытарда да хомуур үлэтэ саҕаланыаҕа.