Саха сирин норуот маастарын күнэ

Сыл ахсын Норуот маастарын күнүгэр ыытыллар сэлэлээн хаамыы норуоппут төрүт ураты тыынын, баай култууратын, уһулуччу талаанын көрдөрөр. Быйыл 8-с сылын ыытыллар сомоҕо хаамыыга Өрөспүүбүлүкэбит араас муннуктарыттан айар куттаах, талааннаах тарбахтаах маастардара, уустара муһуннулар. Чурапчы улууһуттан кэлбит норуот маастара Татьяна Карсанаева кыыһын дьиэ кэргэнин барытын таҥыннаран хаамыыга кыттаары бэлэмнэнэ тураллар. 

Татьяна Карсанаева, СӨ норуот маастара, Чурапчы улууһун олохтооҕо: «Бу оҕо харысхаллаах, курдаах, быһахтаах. Бу былыргы эр киһи кура. Ермолка бэргэһэлээх, үйэ хаамыытынан аныгылартан оҕолору киэргэтэн».

Сэлэлээн хаамыы норуоттар доҕордоһууларын дьиэтиттэн Орджоникидзе болуоссакка диэри ыытылынна. Быйыл 28 улуустан 2 тыһыынча кэриҥэ киһи кэлэн көхтөөх кыттыыны ылан бэйэтин-таҥаһын сабын бар дьоҥҥо көрдөрдө.

Ирина Афанасьева, Бүлүү улууһун норуотун маастара: «Быйыл маастар күнүгэр Бүлүү улууһуттан 20-тэн тахса киһи кэллибит. Маастардартан ураты хаһаактар делегациялара баар».

Светлана Кильбясова, Амма улууһун олохтооҕо: «Үлэһит иистэнньэҥ дьон үлэлэрин көрдөрөллөр».

Александра Слепцова, Муома улууһун олохтооҕо: «Элбэх киһини кытта билистибит, маастар-кылаас игин ыытан».

Саха сиригэр уус-уран оҥоһуктарынан 5 тыһыынча тахса киһи дьарыктанар. Кинилэр оҥорон таһаарар оҥоһуктара, айбыт айымньылара норуоппут төрүт үгэстэрин кэнчээри ыччакка тарҕаталлар, киэҥ эйгэҕэ таһаараллар.

Симэх норуот уус-уран оҥоһуктарын уонна искусствотын национальнай киинэ, култуура министиэристибэтин кытта араас хабааннаах тэрээһиннэри, бырайыактары, күрэхтэри тэрийэр. Ону тэҥэ норуот маастарадарын үлэлэрэ сыаналанарын туһугар тустаах сокуоннар, ыйаахтар тахсалларыгар үлэлэһэллэр.

Яна Игнатьева, "Симэх"  уус-уран оҥоһуктар национальнай киинин дириэктэрэ: «Биһиги Ил Дархаммыт, Бырабыытылыстыбабыт бу норуот үгэстэрэ сайдарыгар элбэх дьаһаллары ыыппыттара. Ол курдук билигин 2033 сылга дылы биһи Бырабыытылыстыбабытынан тахсыбыт өйөммүт торумнаахпыт».

Ол курдук уон сыллаах концепция ылыллан, бигэргэнэн сылын ахсын төрүт үгэспитин илдьэ сылдьааччыларга, сөргүтүүгэ, сайыннарыыга уонна дьоҥҥо-сэргэҕэ тарҕатыыга өҥөлөрүн иһин хас да хайысханан көмө-өйөбүл, тустаах стипендия көрүллэр буолуоҕа.