Горнай улууһугар бальнай үҥкүү көрүҥэр аһаҕас күрэх буолла

Бу курдук Бэрдьигэстээххэ ыытыллыбыт бастакы аһаҕас бальнай үҥкүү күрэһин кыттыылаахтара Сэмэн Данилов аатынан оскуола киэҥ саалатыгар вальстан эргийэллэр,  күн устата барбыт тэрээһиҥҥэ эдэриттэн эмэнигэр тиийэ ыраахтан чугастан кэлбит үҥкүүһүттэр кытыннылар. Күрэс саастарынан уонна сатабылларынан арахсан барда.  Холобур А бөлөххө уопуттаах үҥкүүһүттэргэ оҕолору 4 сааска тыырбыттар, оттон 18-тан үөһээлэргэ 8 сааһынан араарбыттар,  Б бөлөххө  саҥа саҕалааччылар,  манна Горнай кыттааччыларын тэҥэ Ханалас Булгунньахтаахтара кииридлэр. Саамай кыра күрэстэһээччи 4 сааһа эбит буоллаҕына аҕам саастаах кыттааччы Бэрдьигэстээхтэн  84-гэр үктэммит Прокопий Жирков буолла.

Михаил Сивцев, СӨ бальнай үҥкүү федерациятын бэрэсидьиэнэ, дьүүллүүр сүбэ бэрэссэдээтэлэ: «Бу сарсыардаҥҥы күрэхтэһиини көрөн наһаа үөрдүм. Манна наһаа элбэх оҕо бальнай үҥкүүнү сэргээн үҥкүүлүүллэр эбит».

Аһаҕас күрэскэ улахан дьоҥҥо Уус-Алдантан, Бүлүүттэн, Намтан, Хаҥаластан, Мэҥэ-Ханаластан,  Дьокуускайтан, Горнай Солоҕонуттан уонна “Ренессанс” бальнай үҥкүү бөлөхтөрө кытыннылар. Холобур, Уус-Алдан Бороҕонуттан Оксана Протопова Михаил Борисовтыын кэлбиттэр.

Михаил Борисов, Уус-Алдан кыттааччыта: «Манна бэйэбит кэллибит. Бэйэм кыра эрдэхпиттэн дьарыктанабын, паарам сыл курдук дьарыктанна».

Эр дьон маҕан ырбаахылаах, хара бүрүүкэлээх буоллахтарына  дьахталлар араас кэмнээҕи былааччыйанан тахсан уларыйа сылдьар  муусука тэтимигэр уйдаран пааранан үкҥүүлээн кэлбит дьон хараҕын үөртүлэр. Үҥкүү ордук аҕам саастаахтар эрчими биэрэрин, санааны көтөҕөрүн, уопсайынан доруобуйаҕа бары өттүнэн туһалааҕын биир киһи курдук этэллэр.

Лидия Назарова, Дьокуускай куорат "Мозика" ансаамбыл үҥкүүһүтэ: «Элбэҕи биэрэр буоллаҕа: доруобуйаҕа, уйулҕабытыгар үчүгэй».

Түмүккэ улахан дьоҥҥо Бэрдьигэстээх “Ренессанс” бөлөҕө уопсайа 35 мэтээли ылыбытыттан 17 кыһыл көмүс, 11 үрүҥ көмус уонна 8 боруонса буолла. Ол иһиттэн Наталья Андреева 4 кыһыл көмүс 1 үрүҥ көмүс мэтээлэннэ.