Өрөспүүбүлүкэҕэ сүөһү маассабай төрөөһүнэ саҕаланна

Уһун тымныылар уҕарыйан, кулун тутар ый үүнэн халлаан биллэ сылыйда. Кыстык түмүктэнэрэ 3 ый кэриҥэ кэм хаалла. Бүгүҥҥү күҥҥэ өрөспүүбүлүкэ үрдүнэн 167 тыһ. тахса төбө ынах-сүөһү кыстаан турар, онтон ыанар ынаҕын ахсаана 70 тыһыынчаттан тахса.  Күөххэ үктэнэргэ, ыам ыйа бүтүөр диэри тиийэр от баар диэн тыа хаһаайыстыбатын министиэристибэтигэр иһитиннэрэллэр.

Александра Петрова, ТХМ сүөһү иитиитигэр департаменын сүрүннүүр исписэлииһэ: «Оппут саппааһа 48%, сенажпыт 41%, сиилэспит 44% хаалла. Кыстыкка дылы 81 хонук хаалла. Былырыын баччаларга кыра эбит буоллаҕына. Быйыл күөх окко үүктэниэхпитигэр дылы саппаас оттоохпут диэн олобут».

Ааспыт дьыл хаһааҥҥытааҕар даҕаны үтүө, өҥ сайын туран, кыстыкка киириигэ былааннаммыт от барыта оттоммута.

Бөртө сылгы собуота Саха сирин биир бөдөҥ бастыҥ үлэлээх хаһаайыстыбалартан биирдэстэрэ. Хас да улахан киэҥ-куоҥ хотоннорунан ынаҕын-сүөһүтүн кыстатар.Үс пиэрмэнэн туталлар.

Анна Петрова, "Бөртө" сылгы собуотун хаһаайыстыбатын ыанньыксыта: «34 ынахтаахпыт, 29 ыанар, 22 төрөөбүтэ. 313 кг. үүтү ыыбыт күҥҥэ».

Ааспыт күһүн саҥа хотон тутан үлэҕэ киллэрбиттэрэ. Манна билигин ньирэйдэр, борооннор кыстаан тураллар. Сэтинньи ыйтан саҕалаан бастакы төрүөх номнуо баар.

Ульяна Семёнова - "Бөртө" сылгы собуотун хаһаайыстыбатын биригэдьиирэ: «Бу билиҥҥи туругунан 132 ынах төрөөн турар. Уонна кулун тутар ыйынан 80% төрүөн бүтүөхтээхтэр. 100-тэн тахса төрүөхтээх».

Саха сирин үрдүнэн ынах маассабай төрөөһүнэ саҕаланна, билигин хаһаайыстыбаларга уопсайа 5700-тэн тахса ньирэй төрөөтө. Ааспыт сыл бааччаларын кытта тэҥнээтэххэ төрөөһүн көрдөрүүтэ арыый аҕыйах. Күннэтэ төрөөһүн ахсаана эбиллэ турар.  Билигин саамай сүрүнэ хас биирдии төбө ахсаанын энчирэппэккэ этэҥҥэ кыстатан таһаарыы - сүрүн сыал-сорук.