Өрөспүүбүлүктээҕи 2-с нүөмэрдээх балыыһа саҥа мэдиссиинэ тэрилин ылла

Уопуттаах эндоскопист-быраас Андрей Филиппов саҥа мэдиссиинэ тэрилин туһанан киһи иһин чинчийиини ыытар. Бу аҕыйах хонуктааҕыта эндоскопия салаатыгар балыыһа бэйэтин үбүнэн гастроскопия, колоноскопия курдук уустук чинчийиилэри, оннооҕор араас эппэрээссийэлэри оҥорор кыахтаах аныгы үйэ ирдэбилигэр толору эппиэттиир тэрили ылан, туспа кабинет анатан үлэлэрин саҕалаатылар.

Андрей Филиппов, Өрөспүүбүлүкэтээҕи 2-с нүөмэрдээх балыыһа эндоскопия салаатын эндоскопист-бырааһа: «Бу аппараатынан кыра эппэрээссийэлэри оҥорорго ордук».

Бу манна ис-үөс, куртах ыарыылаах дьон кэлэн көрдөрүнэллэр, оһоҕосторугар чинчийии ааһаллар.

Чинчийии бүттэ да орто анал медицинскэй үлэһиттэр туттуллубут маллары барытын ыраастааһын үлэтигэр умса түһэллэр. Ыраастааһын хас да түһүмэҕинэн арахсан ыыттыллар. Уопсайа биир аппараты 25 мүнүүтэ устата киртэн-хохтон, араас бактериялартан ыраастыыллар.

Ол кэнниттэн дезинфекция үлэтигэр анал аппараттар үлэҕэ киирэллэр. Туспа бырагырааманан хааччылыылаах тэриллэр бүтэһиктээх ыраастааһын үлэтин ыыталлар.

Надежда Сивцева, Өрөспүүбүлүкэтээҕи 2-с нүөмэрдээх балыыһа эндоскопия салаатын аҕа сиэстэрэтэ: «Дезинфекция үрдүк таһымын ааһаллар. Бэйэтэ туспа бырагырамаллаах. Хас биирдии аппараат дезинфекция ааспытын кэннэ анал харайар ыскаптаах. Онно аныгыскы туттуллуутугар дылы сытар».

Саҥа тэрил кэлэн тустаах чинчийиилэри ыытар тус-туһунан 3 кабинет үлэлиир буолла. Онон күүттэрии, кэтэһиннэрии уонна уочараттааһын диэн суох буолла. Бу кабинеттар тохтобула суох төгүрүк суукка ыарыһахтары ылар кыахтаахтар.

Зоя Яковлева, Өрөспүүбүлүкэтээҕи 2-с нүөмэрдээх балыыһа эндоскопия салаатын сэбиэдиссэйэ: «Аныгы аппарат буолан барытын устар, хаартыскаҕа түһэрэр. Ол иһин хаһан баҕар архыып курдук арыйан көрүөххэ сөп уонна туох баар эппэрээссийэлэри барытын ити аппаратынан оҥоробут».

Мантан салгыы балыыһа өссө да инникитин бэйэтин үбүнэн, бүддьүөт харчытын табыгастаахтык туһанан саҥа тэриллэри ылар соруктаах. Эргэрбит тэрили солбуйуу уонна материальнай-техническай баазаларын хаҥатан үлэ таһымын үрдэтии тутаах сорук буолар.