Дьокуускайга "Нация доруобуйата - биһиги илиибитигэр" диэн конференция буолла

73

Мэҥэ Хаҥалас улууһуттан төрүттээх Ирина Сергучева хараҕынан инбэлиит. Кини медицинэ коллеһыгар массажист идэтигэр уһуйулла сылдьар, Ирина үөрэҕэ ыытар научнай-практическай конференциятыгар массаж туһатын, чуолаан суджок-терапия туһунан дакылаат бэлэмнээбит. 

Ирина Сергучёва, Дьокуускайдааҕы мэдиссиинэ коллеһын устудьуона: «Суджок-терапия диэн сүрүн сыала диэн – илиигэ уонна атахха баар акупунктурнай туочкалары кытта үлэлээһин. Ол ньыманнан киһи доруобуйатын барытын толору эмтиэхпитин сөп».

Конференцияҕа медицинэ коллеһын устудьуоннара көхтөех кыттыыны ылаллар. Быйыл онус сылын ыытыллар тэрээһин 4 секциянан барда. Ол курдук дьиэ кэргэн доруобуйатын харыстабылын, киһи доруобуйатын бөҕөргөтүүгэ тосхоллор, ыарыылары быһаарыы, эмтээһин хайысхаларын, итиэннэ чөл олоҕу киллэриигэ төрүт үгэстэр суолталарын тематынан кыттааччылар бэйэлэрин үлэлэрин бэлэмнээтилэр.

Надежда Ядреева, Дьокуускайдааҕы мэдиссиинэ коллеһын дириэктэрин солбуйааччы: «Быйылгы конференцияҕа атын регоннартан, Казахстантан уонна маннааҕы 9 үөрэх кыһатын оҕолоро кытталлар».

Конференция чэрчитинэн, англия тылыгар билингвальнай олимпиада, куонкурсар, эссэлар, араас бырыайыактар күрэхтэрэ, маастар-кылаастар тэрилиннилэр. Этиллибитин курдук конференция биир ураты хайысхатынан чөл олоххо төрүт үгэс суолтата диэн секция ылла. Эрсан Неустроев оҕо айымньытын киинин үһүс кылааһын үөрэнээччитэ. Кини эт-хаан өттүнэн сайдыыга остуол оонньуутугар маастар-кылаас көрдөрдө.

Эрсан Неустроев, Дьокуускайдааҕы оҕо дыбарыаһын үөрэнээччитэ: «Бу оонньуу – токур суол. Манна тулуур уонна баланс тутуһуохха наада. Биир айаҥҥа 1-7 дылы харах сүүйүөххэ сөп».

Фаина Авдеева аатынан оҕо айымньытын киинин иитиллээччилэрэ остуол оонньуутун билиһиннэрэ кэлбиттэр. Бу ооньууларынан эбии дьарык быһыытынан ким баҕарар кэлэн ооньуон сөп, ону тэҥэ доруобуйаларыгар хааччахтаах оҕолор дьарыктаналлар эбит.

Александр Винокуров, Дьокуускайдааҕы оҕо дыбарыаһыгар физкультура учуутала: «Элбэх оонньуу баар: керлинг, токур суол, түргэн кубиктар, сыырдаах сохсо. Бу оонньуулары сороҕун бэйэбит айбыппыт оҕолору кытта».

Конференция түмүгүнэн резолюция ылынахтара, ол докумуон орто үөрэх кыһаларыгар барыларыгар тарҕаныаҕа.