12 саастаах эдэр уруһуйдьут быыстапката тэрилиннэ

Бүгүн 12 саастаах Воваҕа ураты суолталаах күн. Кини уруһуйдарынан уус-уран ойуулуур-дьүһүннүүр түмэлгэ "Хрустальный звон души" диэн быыстапка арыйдылар. Үөрүүлээх быһыыга майгыга эдэркээн худуоһунньук доҕотторо-атастара, учууталлара уонна чугас дьоно кэллилэр. Эҕэрдэ тыл эгэлгэтэ этилиннэ.

Мария Шестакова, СӨ Национальнай ойуулуур-дьүһүннүүр түмэл үлэһитэ: «Ойуулуур-дьүһүннүүр түмэл биир сүрүн хайысхатынан бары дьоҥҥо бырытыгар сөптөөх усулуобуйа тэрийэн, инклюзивнай бырайыактары олоххо киллэрээһин буолар. Ол курдук бу “Хрустальный звон души” диэн быыстапка “Музей для всех” диэн социокультурнай бырайыак чэрчитинэн ыытыллар»

Уруһуй Воваҕа терапия биир көрөҥүнэн буолар. Илиискэ хартыынатын тиһэр кэмигэр отой аралдьыйбакка, умсугуйан туран уруһуйдуур. Кини талаана, уруһуйга дьоҕура арыллыбыта чугас аймахха үгүс соһуйууну аҕалбыта.

Евгения Ким, худуоһунньук ийэтэ: «Биһи бары сөҕөбүт. Биһи дьиэ кэргэммитигэр ким да айар үлэнэн дьарыктаммат этэ. Ол иһин уруһуйдаан барбыта соһуччу этэ».

Вова Ким талба талаанын уһуйааччылара эмиэ бэлиэтииллэр. Былырыыҥҥы сылтан уруһуй уруогар үөрэтэр учуутала тута ураты көрүүлээх оҕо буоларын өйдөөн көрбүтүм диэн бигэргэтэр.

Клара Наумова, СӨ Саҥа технологияларын институтун эбии үөрэхтээһинин уһуйааччыта: «Тута көрбүтүм худуоһунньук хараҕынан көрөр оҕо эбит диэн. Сорудах биэрдэххэ сүрдээх түргэнник уруһуйдуур».

Вова ийэтэ оҕото төһө даҕаны доруобуйата хааччахтааҕын иһин тус талаанын сайыннаран чыпчааллары дабайыа уонна улаатан баран идэ баһылыа диэн баҕа санаалаах

Евгения Ким, худуоһунньук ийэтэ: «Баҕа санаам иллюстратор идэлэннин диэн».

Ураты худуоһунньук маҥнайгы кылаастан араас таһымнаах уруһуй күрэхтэригэр кыттыыны ылар. Доруобай оҕолору кытта бииргэ күрэхтэһэн араас бириистээх миэстэлэргэ тиксэр. Бу быыстапка Вова Ким салгыы худуоһунньук суолун тэлэригэр бигэ тирэх, улахан хардыы буолла.