Улуустартан Авиалесоохрана байыастара Дьокуускайга кэлэн анал үөрэҕи ааһаллар

Авиалесоохрана байыастарыгар сайыҥҥы ойуур баһаардарыгар бэлэмнэниилэр саҕаланнылар уонна кулун тутар бүтэһигэр диэри ыытыллыахтара. Киһи, тиэхиникэ сатаан тиийбэт сирдэригэр байыастар бөртөлүөтүнэн тиийэллэр. Күн бүгүн үөһэттэн түһүү албастарын чочуйаллар. 10, 20, 30 уонна 50 миэтирэттэн түһэн холоноллор.

Үс күннээх дьарыгы Таатта, Сангар уонна Бэрдьигэстээх баһаарынайдара кэлэн ааһа сылдьаллар. Бүгүн дьарык тиһэх күнэ. Маҥнайгы күннэргэ вышкаттан түһэн бэлэмнэнэр эбит буоллахтарына билигин номнуо бөртөлүөккэ көстүлэр.

Николай Копырин, “Авиалесохрана” Дьокуускайдааҕы салаатын сүрүннүүр летчик - кэтээччитэ: «Бастаан вышкаттан түһһэллэр. Барытын түргэнник оҥоруохтаахтар. Онно эрчиллэн баран манна бөртөлүөккэ практика ааһаллар».

Үөһэттэн түһүү биллэн турар үгүс эппиэтинэһи, болҕомтону уонна сэрэхтээх буолууну эрэйэр. Хас биирдии десантник таҥаһын-сабын, туттар сэбин бэрэбиэркэлииллэр.

Байыас мала-сала барыта туох баар ирдэбиллэргэ эппиэттиир, сөптөөхтүк иилиллибит буоллаҕына дьарыкка киирэргэ быраап ылар уонна бөртөлүөккэ киирээри бэлэмнэнэр.

Порфирий Габышев, “Авиалесохрана” Дьокуускайдааҕы салаатын десантнай - баһаарынай хамаандатын инструктора: «Туорумастыыр блоктар, түһэр быа 120 кг. ыйааһыны уйар. Бөртөлүөккэ киирэн холбоноллор уонна төрдүө буолан түһэн бараллар».

Идэ эйгэтигэр уопуттаах десантниктар этэллэринэн сайыҥҥы баһаарга үлэ саамай уустуга үөһэттэн түһүүгэ эбэтэр уоту утары охсуһууга буолбатах. Сүрүн уустуга алаһа дьиэттэн тэйиигэ сытар.

Сергей Васильев, Бэрдьигэстээхтээҕи авиабаза десантнига: «Уустуга диэн – өр сырыттахына дьоҥҥун ахтааһына. Сороҕор ыйтан ордук сылдьаҕын».

Сайын аайы Саха Сиригэр мөлүйүөнүнэн гектар ойуур умайар. Холобур 2023 сыллаахха уопсайа мөлүйүөнтэн тахса га баһаарга былдьаммыта. Суостаах уоту умулларыы үлэлэригэр Авиалесоохрана байыастара солбуллубат күүс буолаллар.