Бу күннэргэ Россельхознадзор инспектордара үүнээйилэри бэрэбиэркэлииллэр

Сибэккини үүннэрээччи Николай Винокуров Россельхознадзор инспекторын көрсөр. Быйылгыттан саҕалаан Хатас нэһилиэгэр дьоҕус сибэкки пиэрмэтин арынан номнуо бастакы үүнүүтүн хомуйаары бэлэмнэнэр. Саҥа саҕалааччыга инспектор аан маҥнайгы сырыыта.

Инспектор саҥа саҕалааччыга өйдөтүү-сэрэтии үлэтин ыытар. Ханнык ыарыылар, үөннэр баалларын билиһиннэрэр. Араас көрдьүгэннээх, дьааттаах ыарыылар сибэккини тутатына буортулуулларын-өлөрөллөрүн, аттытыгар турар үүнээйилэри сутуйуохтарын сөбүн кэпсиир. Атын сиртэн, дойдуттан киирэр сиэмэлэргэ, үүнээйилэргэ үрдүк болҕомто уурууллуохтааҕын быһаарар.

Светлана Белолюбская, Россельхознадзор Саха сирин уонна Амурскай уобалаһын салалтатын үүнээйини уонна сиэмэ хаачыстыбатын кэтиир салаа аҕа инспектора: «Ыарыы араас буолар. Харантыыннай да суолталаах ыарыы буолумуон сөп. Ол иһин талар буоллахытына үчүгэй доруобай көрүҥнээх сибэккини талыахытын наада. Сытыйбыт, хараарбыт, үөннээх буоллаҕына ыла сатааман».

Бу пиэрмэҕэ сибэккилэр сөптөөх, табыгастаах усулуобуйаҕа үүнэ тураллара көстөр. Биир сиргэ тэҥинэн араас дьэрэкээн көстүүлээх тюльпаннар кэккэлэһэ тураллар. Бу хоско быһа холоон 3 тыһыынча сибэкки үүнэр.

Саҥа саҕалааччы Винокуровтар дьиэ кэргэн бастакы холонууларыттан үөрэллэр эрэ. Элбэх көрүүнү-истиини эрэйэр үүнээйилэрин этэҥҥэ таһаартаан аны нэһилиэнньэҕэ хамаҕатык батарар сорук турар.

Николай Винокуров, сибэкки үүннэрээччи: «Көрүүлээх истиилээх. Бастаан сыыһалары оҥорор этибит, ол да буоллар сибэккилэрбитин үүннэрдибит. Микро-килиимэтин тутуохха наада, харайара уустуктардаах. Килиимэппит кыратык уларыйда даҕаны сибэккибит өлөр эбэтэр ыалдьар кутталлаах».

Кулун тутар 8 күнүгэр кэрэ аҥардар күннэрин көрсө 6-7 чыыһылаларга Саха сиригэр элбэх сибэкки киирэрэ күүтүллэр. Сибэккини таларга болҕомтолоох уонна сэрэхтээх буоларгытын умнубаккытыгар ыҥыраллар.