Саха гимназиятыгар Андрей Ощепковка аналлаах “Дьоруой Паартата” турда

Саха гимназия дьиэтэ. Оскуола төрөппүтүгэр, байыаннай идэлээх буойуҥҥа, 2022 сыл сайыныгар Донецкай уобаласка сырдык тыына быстыбыт Андрей Ощепковка анаммыт дьоруой партатын турорудулар.

Үгүс киһини долгутар тэрээһиҥҥэ Андрей Валерьянович бииргэ сулууспалаабыт доҕотторо-атастара, чугас дьоно-сэргэтэ, Саха гимназия учууталлара уонна үөрэнээччилэрэ кэлэн буойуну ахтан-санаан аастылар. Маннык тэрээһин үүнэн эрэр эдэр көлүөнэни иитиигэ, аҕа дойдуга тапталы, бэриниини үөскэтэргэ үтүө түмүктэрдээх.

Валентина Софронеева, Саха гимназиятын дириэктэрэ: «Андрей Валерьянович сүрдээх аламаҕай аҕа уонна бииргэ төрөөбүттэригэр убай, быраат. Бу оскуолаҕа улахан бэлэх, биһи оҕолорбут байыаннай-патриотическай иитиилэригэр улахан кылаат буолар».

Андрей Ощепков икки кыыс оҕото Саха гимназиятыгар үөрэнэллэр. Кинини учууталлар өрүү оскуола олоҕор актыыбынай кыттыылаах аҕа этэ диэн бэлиэтээн этэллэр.

Инга Хомподоева, Андрей Ощепков бииргэ төрөөбүт эдьиийэ, Саха гимназиятын учуутала: «Кини олоҕун билигин кини кыргыттара салҕыыллар – Милана уонна Карина. Кинилэр эккиэн Саха гимназиятыгар үөрэнэллэр. Карина 9 кылааска үөрэнэр, Милана 4 кылааска үөрэнэр».

Өр сыллар тухары санны-санныга бииргэ сулууспалаабыт доҕотторо-атастара Андрей Ощепков Кавказ сиригэр-уотугар буолбут байыаннай дьайыы саҕаттан бэйэтин хорсун буойун быһыытынан көрдөрбүтэ диэн ахта саныыллар.

Святослав Татаринов, полиция полковнига: «Кавказ анал дьайыыларыгар кыттан бэйэтин хорсуннук көрдөрбүтэ»

Сүрүннээн аҕалар түмсүүлэрэ харчынан көмөлөһөн, күүскэ үлэлээн бу курдук бэлэҕи гимназияҕа ууннулар, оҕолор дойдуга бэриниилээх буолалларын ситиһэргэ улахан кылааты уурдулар. Өссө анал стендэлэр баар буолуохтара.