Ойуур баһаардарыгар бэлэмнэнии саҕаланна

Авиалесоохрана баһаарынайдарын үөрэхтэрэ саҕаланна. Билигин Дьокуускайдааҕы салаа базатыгар үөрэх 3 түһүмэҕин  ааһааччылара кэлэн, холобура, күн бүгүн үөһэттэн сөптөөхтүк түһүүгэ үөрүйэхтэрин чочуйаллар.

Сайыҥҥы ойуур баһаардарыгар бэлэмнэнии номнуо саҕаланна. Бүгүҥҥү тэрээһиҥҥэ Горнай, Кэбээйи уонна Таатта салааларын байыастара үөрэҕи ааһаллар.

Николай Лебедев, "Авиалесоохрана" Тааттатааҕы салаатын баһаарынайа: «Бэнидиэнньиккэ кэлбиппит 17 буолан. Куттал суох буолуута тиэхиникэтин уонна десаҥҥа бэлэмнэнии. Сарсын бөртөлүөттэн түһэбит».

Үөрэтии чопчу түһүмэхтэринэн, туох баар ирдэбили тутуһуунан ааһар. Холобура, бу үөһэттэн түһүүгэ байыастары ымпыктаахтык бэрэбиэркэлииллэр. Манна сүрүн инструктор, Дьокуускайдааҕы Авиалесоохранаҕа 16 сылын бэриниилээхтик үлэлии сылдьар Порфирий  Габышев хас биирди байыаһы болҕомтолоохтук, сыныйан көрөр.

Порфирий Габышев, "Авиалесоохрана" Дьокуускайдааҕы салаатын десантнай-баһаарынай хамаандатын инструктора: «Мин үлэм диэн, манна туран эрэ вышкаҕа тахсар уолаттары манна бэрэбиэркэлиибин барытын. Тэриллэрин сөпкө кэппиттэрин барытын көрөн баран таһаарабын. Кыра сыыһаттан арааһынай буолуон сөп. Үөһээттэн сууллан түһэн эчэйиэхтэрин сөп».

Быйыл Өрөспүүбүлүкэҕэ тустаах биэдимистибэ исписэлиистэрин 37 байыаһынан элбээтилэр. Ол чэрчитинэн, Томпо улууһун Хандыгатааҕы салаата парашютнай бөлөхтөнүө. Маныаха саҥа үлэһиттэр Бүлүүгэ, Сангаарга, Өлүөхүмэҕэ, Ленскайга уонна Уус-Майаҕа эбиллиэхтэрэ.

Николай Копырин, Авиалесоохрана" Дьокуускайдааҕы салаатын сүрүннүүр лётчик – кэтээччитэ: «Вышкаттан түһэ сылдьаллар, сарсын бөртөлүөттэн түһэ барыахтаахтар. Бэлэмнэниибит сүрүн сыала: бөртөлүөттэн сөпкө тахсааһын, сөпкө сири көрсөллөрө уонна быаны төлөрүтээһин. Бэҕэһэ Нөмүгүттэн парашютистар үөрэнэн кэлбиттэрэ, кинилэргэ саҥа курс буолбута».

Бу кэннитэн байыастар салгыы бөртөлүөтүнэн түһүү үөрэҕин ааһыахтара. Анал үөрэтиилэр кулун тутар бүтэһигэр диэри ыытыллыахтара.