Дьокуускай библиотекатыгар «Доруобуйаҕа - күөх уоту» диэн аахсыйа ааста

Дьокуускайдааҕы 9№-дээх орто оскуола уонна Айыы кыһатын үөрэнээччилэригэр ураты күн үүннэ. Сарсыардаттан оҕолор оскуолаларыгар буолбакка, Смарт библиотека дьиэтигэр кэллилэр. Кинилэр манна “Доруобуйаҕа - күөх уоту” диэн аахсыйаҕа кытталлар. Тэрээһин үөрэнээччилэргэ интэриэһинэй буоллун диэн оонньуу форманан ыытылынна. Ньургуйаана Необутова 9№-дээх оскуола алтыс кылааһын үөрэнээччитэ. Бииргэ үөрэнэр кыргыттарын кытта туспа хамаанада буолан биктэриинэҕэ кытыннылар.

Ньургуйаана Необутова, Дьокуускайдааҕы 9№-дээх оскуола үөрэнээччитэ: «Хачайдаан тыыҥҥа киллэрэргэ үөрэннибит, өс-хоһооннору таайдыбыт уонна доруобай, куһаҕан астары биллибит».

Манна бэйэ оонньуута интерактивнай биктэриинэ уонна Доруобуйа марафона диэн квест оонньуу элбэх оҕо болҕомтотун тарта. Киһиэхэ бастакы көмөнү оҥоруу хайысхатын элбэх оҕо сэҥээрдэ. Дьокуускайдааҕы медицинэ коллеһын устудьуоннара манекеҥҥа өйүн сүтэрбит, уҥмут киһиэхэ бастакынан туох көмөнү оҥороллорун көрдөрөн, үөрэтэн биэрдилэр. 

Юрий Аммосов, Дьокуускайдааҕы медицинэ коллеһын устудьуона: «Сүрэҕэ тохтоотоҕуна, өйүн сүтэрдэҕинэ, тыына тохтоотоҕуна онно бастакы быраас кэлиэн иннинэ көмө буолар».

Оҕолор хамаандаларга арахсан биэс станцияларынан бэрт интэриэһинэй ыйытыыларга хоруйдаатылар. Боппуоурстар сүрүннээн киһи доруобайатыгар, араас ыарыылары төһө билэллэригэр, итиэннэ ханнык ас туһалааҕар уонна буортулааҕар ананнылар. Аахсыйа тэрийээччилэртэн биирдэстэринэн нэһилиэнньэ доруобуйатын харыстыыр, ыарыыны сэрэтэр киин буолла. 

Саргылаана Титова, нэһилиэнньэ доруобуйатын харыстыыр уонна ыарыыны сэрэтэр киин методист бырааһа: «Нэһилиэнньэ доруобуйатын харыстыыр, чөл олохтоох буолууга үөрэтэбит. Муниципалитет таһымыгар үлэлиибит, ол таһынан тэрилтэлэргэ бырагыраамалары ыытабыт».

Номнуо 24 сылын Өрөспүүбүлүкэ үрдүнэн олунньу бүтэһик өрөбүл күнүгэр Доруобуйа национальнай күнэ бэлиэтэнэр. Сыллата туһааннаах декада чэрчитинэн балыыһаларга аһаҕас аан күннэрэ, тэрилтэлэргэ, үөрэх кыһаларыгар араас тэрээһиннэр ыытыллаллар. Сүрүн сыал-сорук - үүнэр көлүөнэ доруобуйата чөл буоларыгар болҕомто ууран үлэлэһии.