Сэбээн Күөлүн 90 сылын чэрчитинэн Дьокуускайга быыстапка арылынна

Өрөспүүбүлүкэбит биир ураты тыыннаах, эбээннэр түөлбэлээн олорор сирдэрэ Сэбээн Күөлүн күннэрэ киин куоракка. 90 сыллаах үбүлүөйдээх күнэ үгүс дьону түмтэ.

Кэбээйи улууһун биир тарбахха баттанар национальнай нэһилиэгэр күн бүгүн 717 киһи олорор. Сэбээннэр төрүт дьарыктара таба иитиитэ буолар. Онон быыстапкаҕа табаһыттар, ыстаада олоҕун тыына биллэр.

Людмила Бурцева, "Сэбээн" МУТ таба хаһаайыстыбатын салайааччыта: «Бу быыстапкалар улахан суолталаахтар дии саныыбын. Мин табаһыттарым аһаҕас халлааҥҥа сылдьар буоланнар түү таҥаһы уонна сарыы диэн таҥастары куруук туттабыт. Биһи көһө сылдьар норуоттар маннык таҥаһа суох табаларбытын сиппэппит, табалаабаппыт. Бэйэбит үлэбитин эмиэ быыстапкаҕа аҕалан туруордубут».

Быстаапкаҕа Сэбээн көмүс тарбахтаахтарын үлэлэрэ турбуттара киһи хараҕын сыллаанньытар, бииртэн биир кэрэ үлэ дьон болҕомтотун тардар.

Афанасий Степанов, Сэбээн-Күөлүн ытык кырдьаҕаһа: «Мин кэргэним – Степанова Вера Владимировна үлэлэрэ. Кини үлэлэрэ 1990 сыллардаахха Марсель куоракка дылы тиийэ сылдьыбыттара. Фольклорнай ансаамбыл “Мэрлэнкэ” кини таҥастарынан сылдьыбыттара. Кэнники Москва куоракка “Северная цивилизация” диэн быыстапкаҕа кыттыбыта, онно көмүс мэтээл биэрбиттэрэ бу үлэлэргэ».

Күн бэҕэһээ норуот маастарын үрдүк аатын сүкпүт Антуанетта Абрамова айар үлэбит сүрүн сыала кэнэҕэски ыччакка тириэрдии буолар диэн тоһоҕолоон этэр.

Антуанетта Абрамова, норуот маастара: «Былыргылы туому тутуһабыт, оҕолорбутугар үөрэтэ сатыыбыт. Тылбытын эмиэ үөрэтэтбит: ырыаннан, үҥкүүннэн эдэр ыччакка тириэрдэбит».

Маныаха быыстапкаҕа сүрүн бас-көс миэстэни Сэбээннэҕи кыраайы үөрэтэр түмэл экспозицията ылар.

Николай Кривошапкин, Сэбээннээҕи кыраайы үөрэтэр түмэл исписэлииһэ: «Швецияҕа, Норвегияҕа, Аляскаҕа уонна улахан киин куораттарбытыгар: Москваҕа, Санкт-Петербурга бастакы Президеммит – Михаил Ефимович Николаев Хотугу форум норуоттар икки ардыларынааҕы таһымҥа киирбитигэр, онно култуурунай тэрээһиннэргэ илдьэ сылдьыбыта».

Үбүлүөй чэрчитинэн маастар-кылаастар, көрсүһүүлэр, кэнсиэрдэр ааһыахтара. Оттон быыстапка олунньу 29 күнүгэр диэри үлэлиэҕэ.