Саха сиригэр 150 км. тахса региональнай суолу өрөмүөннүөхтэрэ

Быйылгы үүммүт сылга Дьокуускай куоракка уопсайа 30-ча кэриҥэ суолу өрөмүөннүөхтэрэ. Барыта 40-ча килэмиэтир усталаах суол оҥоһуллара күүтүллэр. Маныаха ааспыт сылтан ылата ыытыллар эбийиэктэргэ үлэлэр салҕанан барыахтара. Ол курдук, Сайсаар оройуонугар Винокуров уулуссатын, Бүлүүлүүр переулогы уонна Можайскай суолун ситэриэхтэрэ. Маны тэҥэ аны сайын «Азия оҕолоро» спортивнай оонньууларынан сибээстээн үгүс суоллары көннөрөн биэриэхтэрэ.

Василий Амбросов, Дьокуускай куорат транспорын уонна суол хаһаайыстыбатыгар салалтатын салайааччы: «Ыам ыйын бастакы күннэриттэн улахан дьаамалар өрөмүөннэригэр киириэхтээхпит. Куорат ханнык уулуссатын хаһан сабарбыт номнуо биллэн турар, онон ыам ыйыттан ол үлэлэрбитин саҕалыахтаахпыт».

Оттон кулун тутар ыйтан бастакы үлэлэр номнуо ыытыллыахтара. Чернышевскай уулуссатыгар Водоканал тэрилтэ үһүс коллекторын тутуута салҕанарынан, бу суолга эмиэ хаһыы үлэлэрэ барыахтара, онон транспорт сырыыта хаачахтаныаҕа. Улуустарынан ыллахха быйыл Өрөспүүбүлүкэ үрдүнэн уопсайа 150-ча км. кэриҥэ өрөмүөн үлэтэ былааннанан турар.

Александр Шипошин, СӨ массыына суолларын салалтатын үлэлэҕэ киллэриигэ салаатын салайааччы: «Томпо улууһугар «Яна» суолугар күүстээх үлэ бара турар. Тополинайга дылы 45 км. 470 м. курдук суол өрөмүөннэниэҕэ».

Ону тэҥэ «Умнас» суолга куораттан Покровскайдыыр тахсыыга оҥоһулла сылдьар 8 км. тахса усталаах учаастак өрөмүөнүн түмүктүөхтэрэ.

Сергей Дьячковскай, СӨ массыына суолларын салалтатын капитальнай тутууга салаатын салайааччы: ««Умнас» региональнай суол учаастага 8.2 км. усталаах реконструкциялааһын кэнниттэн үлэҕэ киириэхтээх. Трасса 4 балаһалаах оройуоннаҕы суолталаах магистральнай уулусса кылааһа буолуохтаах. Билиҥҥи туругунан эбийиэк былаантан 50% оҥоһуллан турар».  

Быйыл бу учаастак оҥоһуллан түмүктэниэхтээх, «Умнас» суолугар Өлүөхүмэ иһигэр эмиэ аспаал, бетон үлэлэрэ барыахатра. Маны тэҥэ куораттан тахсыыга Намныыр суол учаастагын өрөмүөнэ эмиэ бүтүөхтээх. Нам улууһугар уопсайа 10 км. суолу оҥоруохтара. Ону таһынан Амма, Мэҥэ-Хаҥалас, Уус-Алдан, Таатта, Мииринэй, Бүлүү улуустарыгар суолу саҥардыы үлэлэрэ ыытыллыахтара.

Быйылгы уонна кэлэр сылларга эмиэ улахан үлэ былааннанар. Бу сылга 33 суолу тэҥэ, бэрт суолталаах муосталары, туорааһыннары тутуу, оҥоруу үлэтэ салҕаныаҕа.