Дьокуускайы хаартан босхолооһун үлэлэрэ салҕаналлар
Докуускай куорат уулуссаларыттан хаары ыраастааһын үлэтин тэтимэ өссө түргэтээн турар. Холобур Сайсаар уокуругуттан билиҥҥи туругунан 7 тыһ. м3 кэриҥэ тиэйдилэр. Күн ахсын уокуруккка 3-4 тиэхиникэ үлэ үөһүгэр сылдьар. Үлэһиттэр этэллэринэн Быйыл хаар чараас, ол эрэн мантан саас балаһыанньа өссө хайдах буолара биллибэт.
Олег Захаров, Сайсаар уокуругун салайааччытын солбуйааччы: «Сааскы санитарнай ыраастааһын чэрчитинэн Сайсаар уокуругун иһиттэн көхтөөхтүк хаар таһааран эрэбит».
Куорат үрдүнэн уопсайа 310 тыһ. тахса м3 хаары номнуо тастылар. Куорат хаара анал полигоҥҥа тахсар. Маныаха, Дьокуускай эргин 2 анал сир баар.
Ыраас, анал чинчийиини ааспыт хаары Сэбиэскэй армия 50 сыла уулуссаҕа, онтон кирдээх хаары Бүлүүлүүр суолга турар полигоннарга тиэйэллэр.
Мария Мигалкина, Дьокуускайдааҕы айылҕа харыстабылын кэмитиэтин салайааччытын солбуйааччыта: «Харыстанар сиргэ киириэ суохтаах: оҕо былаһаккаларыгар, от-мас баар, уу баһар уонна харыстанар сирдэргэ».
Көҥүлэ суох сиргэ хаары тиэйэн суөкээһин ыстарааптаах. Холобур кирдээх хаары Бүлүүлүүр суолга турар полигонтан ураты атын сиргэ тоҕор түгэннэригэр 250 тыһ. солкуобайга дылы ыстыраап көрүллүөн сөп.
Мария Мигалкина, Дьокуускайдааҕы айылҕа харыстабылын кэмитиэтин салайааччытын солбуйааччыта: «Киртийбит хаар көҥүлэ суох сиргэ быраҕылыннаҕына – Арассыйа Бэдэрэссийэтин административнай сокуонуонун кэһии кодексын 8.2 ыстатыйата туттуллар. Ыстараап – 250 тыһ. солк. диэри тиийэр».
2017 сылга диэри анал хаары харайар полигон билигин быстах кэмҥэ хаары муһар сир буолан турар. Онон муус устар 15 күнүгэр диэри туох баар муһуллубут хаар ыраастанан Сэбиэскэй армия 50 сыла уулуссаҕа турар полигоҥҥа, онтон хаалбыт бөҕү-саҕы бөх полигонугар тиэйиэхтээхтэр.
Төһө даҕаны 2 полигон баарын үрдүнэн хаары харайарга миэстэ тиийбэт. Билигин Куорат дьаһалтата туох баар айылҕа харыстабылын ирдэбиллэригэр эппиэттир эбии полигон сирин көрдүүр. Онтон айылҕа харыстабылын кэмитиэтин үлэһиттэрэ хаары уулларар тэрили Дьокуускайга туруорары туруорсаллар.
