Перинатальнай кииҥҥэ аһаҕас аан күннэрэ

Быраастар саҥардыы ийэ, аҕа буолаары сылдьар дьону батыһыннара сылдьан эрэ саас сааһынан сиһилии төрөөһүн хаамыытын кэпсииллэр. Аһаҕас аан күнүгэр 7 саҥардыы тэриллибит ыал кэлэн эһээхэй оҕону көрүү-истии кистэлэҥин иһиттилэр.

Сардаана Такырова, акушер-гинеколог быраас: «Олунньу уонна кулун тутар ыйдарга биһиэхэ “Вместе с семьей” диэн аахсыйа буолар. Бу аахсыйа иһинэн аһаҕас аан күннэрэ хас сэрэдэ аайы буолар. Бүгүн бастакы күммүт».

Аһаҕас аан күннэрэ сөргүтүллэн тутатына дьон сэҥээриитин ылла. Саҥа киһиэхэ олоҕу бэлэхтээһин, бастакы оҕону төрөтөөһүн эппиэтинэстээх уонна долгутуулаах буоларын өйдөөн бу маннык көрсүһүүгэ сылдьаллар.

Үүйэ Пестрякова, төрөтөр салаа сэбиэдиссэйин эбээһинэһин толорооччу: «Саамай ыйытар боппуруостара: төһө өр буолабытый, тугу гынабытый, тугу илдьэ киирэбитий, туох анаалыстары туттарыахха наадатын, оҕоҕо туох наадатын ыйыталлар».

Перинатальнай кииҥҥэ туох уларыйыы барбытын, оҕону төрөтүүгэ туох усулуобуйа баарын аһаҕас аан күнүгэр кэлбит дьон сиһилии билистилэр. Дьахтар төрүүр кэмигэр чугас дьоно аттыгар баар буолуохтарын сөп диэн, кинилэргэ туспа хос баарын көрдөрдүлэр.

Зарина Прохорова, акушер-гинеколог быраас: «Мы пропагандируем и рассказываем о приемуществе грудного скармливания. Обо всем рассказывем».

Бу маннык аһаҕас аан күннэрэ хас сэрэдэ күн ахсын ыытыллаллар. Ким баҕалаах суруттаран кэлэн перинатальнай киин үлэтин, быраастар сүбэлэрин кэлэн истиэхтэрин сөп.