Тулагы нэһилиэгэр байыаннай хаамыы күрэҕэр 700-тэн тахса оҕо кытынна

Дойдубут судааыстыбыннай былаахтара киллэриллэн Пантелеймон Иннокентьевич Кочнев аатын сүгэр Тулагы орто агротехническай оскуолатыгар Аҕа Дойду сэриитигэр Кыайыы 79 сылыгар анаммыт байыаннай хаамыыга уонна ырыаҕа күрэҕэ саҕаланар. Бастатан туран төрөөбүт дойдубут өрөгөйүн ырыата сааланы толорор.

Салгыы дьэ саамай күүтүүлээх кэм тосхойор. Биирдии-биирдии кылаастар взводтара дьүүллүүр сүбэ иннигэр хаамыыларын көрдөрөллөр. Манна саамай улахан үлэ хамандыырга сытар, кини кылааһы хайдах салайарыттан бүтэһиктээх түмүк  тахсыаҕа. Онон хамандыырдар, кыралыын-улаханныын олус долгуйаллар.

Эрчимэн Герасимов, Тулагы орто агротехническай оскуолатын 10 кылааһын үөрэнээччитэ: «Хамандыырдаабытым бэһис сылым буолла. Маннык патриотическай тэрээһин сыл аайы ааһар. Хамандыырдыырым олохпор көмөнү оҥоруо дии саныыбын».

Бүгүҥҥү хаамыыны тастан ыҥырыллыбыт ис дьыала уорганын үлэһитэ, нэһилиэк баһаарынай сулууспатын инструктора уонна үөрэх кыһатын бэрэстэбиттэллэрэ дьүүллээтилэр. Манна бастатан туран оҕолор төһө биир сомоҕолоро, хаамыылара, ырыалара, таҥастара-саптара көрүлүннэ.

Июлия Григорьева, Тулагы орто агротехническай оскуолатын аҕа баһаатайа: «Быйыл уопсайа биһиэхэ 716 оҕо хаамар. Бу хаамыы быйыл уратыта диэн Улуу Кыайыы 79 сылыгар, Дьиэ кэргэн уонна Оҕо сылыгар ананар. Хас биирдии кылаас салайааччыта олус долгуйар. Оҕолор эмиэ бу тэрээһиҥҥэ олус эппиэтинэстээхтик сыһыаннаһаллар».

Манна даҕатан эттэххэ, Тулагы орто оскуолатыгар төрөөбүт дойдуга бэриниилээх буолууга иитии көдьүүстээхтик барар. Онно холобурунан буолар, “Альфа” диэн ааттаах байыаннай-патриотическай кулууп. Маныаха билигин оскуолаҕа бу хайысхаҕа ыйынньык бара турар.

Павел Кузьмин, Тулагы орто агротехническай оскуолатын байыаннай-патриотическай иитиигэ үлэһитэ: «Байыаннай-патриотическай хайысха ыйынньыга буола турар. Окопа чүмэчитин оҥорорго оскуола барыта көмөлөспүтэ уонна “Саллаакка сурук” диэн аахсыйаҕа сурук суруйбуттара».

Оттон саамай долгутуулах кэм ааһан, кылаастары наҕараадалааһын саҕаланар. Кыайбыт кылаас, учууталлар, төрөппүттэр үөрүүлэрэ муҥура суох. Кыайыылаахтарга өрөгөй кубогын туттарыллар.

Оттон маннык тэрээһин биллэн туран оҕолору түмэр-сомоҕолуур, төрөөбут дойдуга ытыктабылы, сугуруйууну олохтуур суолталаах.