Кэмпэндээйи туус собуота аан дойдуга соҕотох тууһу тымныы ньыманан сөҥүрдэр

Былыр былыргыттан аатырбыт Кэмпэндээйитээҕи туус собуота. Кыһыннары-сайыннары үлэ тохтобокко барар. Туһалаах минерал биир аһаҕас 7 тыһ. кв.м. иэннээх сөҥүрдүллэр бассейнтан сайынын хомуллар. Кыһын төһөннөн тымныы да туус собуотугар соччонон үчүгэй. Тоҕо диэтэр, бытархан тымныыларга туус ордук үчүгэйдик олорор. Икки сыллааҕыттан бэттэх собуокка бэйэ тууһун киһи сииригэр анаан оҥорон саҕалаабыттара.

Иван Николаев, Кэмпэндээйитээҕи туус собуотун сыаҕын маастара: «Аска туттуллар туус маннык 500 гр. иһиккэ кутуллар. 3 кг. эмиэ – балык, хаппыыста тууһурга барар, 5 уонн 10 кг. арахсар».

Оттон хостонор туус техническэй. Олох-дьаһах коммунальнай эйгэтигэр, сир баайын хостооһуҥҥа анаан бөдөҥ хампаанньалар ылалаллар уонна тыа хаһаайыстыбата сүөһү эбиискэ аһыгар хото туһанар. Туус быдьырхай-көмүрүө быһыылаах, түргэнник ууллар. Бу үрдүк хаачыстыба бэлиэтэ.  

Алексей Игнатьев, Кэмпэндээйитээҕи туус хампаанньатын салайааччы: «Кэмпэндээйи тууһа тымныы ньыманнан аан дойдуга биһиэхэ эрэ туттуллар. Саха сирин тымныыта көмөлөһөр хостуурга. Баар соҕотох хаачыстыбалаах туус буолар».

Ааспыт сылга уопсайа 64 туонна оҥорон бэлэмнээбиттэр. Быйылгы сылга оборудованиеларын тупсаран 150 туоннаҕа тахсар былааннаахтар, Кэмпэндээйи ураты дьикти айылҕалаах сир. Манна 4 туустаах күөл, 3 таас туустаах хайа баар. Нэһилиэк оҕолоро кыраларыттан туус хайдах хостонорун билэллэр, үксүлэрэ бэл туус ылыытыгар үлэлэһэллэр.

Саша Прокопьев, Кэмпэндээйи орто оскуолатын 6 кылааһын үөрэнээччитэ: «Хаһабыт уонна чөмөхтүүбүт. Чөмөх оҥорон баран туонналаах куулга кутабыт».

Соторутааҕыта Ил Дархан Сунтаар улууһугар сылдьан Кэмпэндээйи нэһилиэгин бэлиэ тэрэһиннэригэр сырытта, туус собуотун үлэтин-хамнаһын билистэ. Кэнники кэмҥэ Кэмпэндээйи тууһуттан доруобуйаны бөҕөргөтөр хостор аһыллан саҕалаатылар. Бүгүҥҥү күҥҥэ Саха сиригэр үөрэх кыһаларыгар уопсайа отут хос аһыллыбыт.

Айсен Николаев, СӨ Ил Дархана: «Оҕолорго эрэ буолбакка улахан оҥорон таһаарар тэрилтэлэргэ эмиэ баар буолан эрэллэр. Ол иһин тэнийиэн, элбиэн наада уонна судаарыстыба эрэ буолбакка тэрилтэлэр бэйэлэрэ, улуустар бэйэлэрэ оннук хос туруоруохтарын сөп».

Бу курдук кэнэҕискитин туһаныллар эйгэ кэҥиир чинчилээх, бүгүҥҥү күҥҥэ собуот сылга икки тыһ. туонна кэриҥэ тууһу хостуур, онон кэлэр сылларга хостуур кээмэйин улаатыннарар былааннаах.