"Сахалыы кэпсээ" тэрээһин сахалыы саҥарар араас омугу түмтэ

Филипповтар халыҥ дьиэ кэргэн кырачаан сиэннэрэ хоһоон ааҕан доргутар. Сахалыы тыыннаах, тыллаах иллээх дьиэ кэргэн "Сахалыы кэпсээ" тэрээһиҥҥэ түөрт көлүөнэ буолан сахалыы иитии, саҥарыы тула кэпсэтиигэ кыттыһаллар. 96 саастаах Татьяна Митрофановна 6 оҕо ийэтэ, уопсайа 30-тан тахса, ол эбэтэр 3 көлүөнэ сиэн эбэтэ буолан кэнчээри ыччатын бүтүннүү сахалыы иитэн, саҥардан кэллэ.

Татьяна Филиппова, "Сахалыы кэпсээ" тэрээһин кыттыылааҕа: "Мин Саха сиригэр олороммут сахам тылын бырахпаппын. Нууччалыы төрдүс кылааска диэри үөрэммитим. Сахам дьонун кытары сахалыы кэпсэтэбин. Билигин 96 сааспар сылдьабын. Өссө да олоруохпун баҕарабын".

Сахалыы саҥарыынан эрэ муҥурдамматтар. Бары дьиэ кэргэнинэн араас сахалыы ырыалары ыллыыллар.

Онтон  Хакасия өрөспүүбүлүкэтиттэн 19 сааһыгар көһөн кэлбит киһи уу сахалыы саҥарар.

Бу күн Сахабыт тылын баайын, кэрэтин, дьэрэкээн кустугун, сүөгэйин-сүмэтин таптааччылар, бэйэлэрин төрөөбүт тылларын кэриэтэ ытыктыыр, таптыыр дьон мустан кэрэкэ тыл түһүлгэтин түстээтилэр. Ийэ тылга тапталы хомус нөҥүө иҥэриэххэ сөбүн ыйаллар.

Ульяна Захарова, "Чэгиэн" хомусчуттар ансаамбылларын салайааччыта: "Саха тылын олох умнубакка оҕолорбутугар, сиэннэрбитигэр, биһиги кэннибиттиэн хаалар көлүөнэ иҥэриэхпитин наада. Итиэннэ сахабын дэнэр киһи хайаан да хомустаах буолуохтаах". 

Саха сиригэр 135 омук биир улахан дьиэ кэргэн курдук олорор. 82 национальнай-култуурнай холбоһуктар ситиһиилээхтик үлэлииллэр. Хас да омук култуурата, үгэһэ силбэһэн күннээҕи олоххо бэйэ-бэйэлэрин ситэрсэн биэрэллэр.

 Бүрээт, тува, хакаас, кыргыыс уонна да атын омук саха тылын үөрэтэн  санааларын аһаҕастык этинэр, биир түһүлгэҕэ олорон эрэ кэпсэтэллэр. Бэйэ-бэйэҕэ ытыктабыл, доҕордоһуу уонна сомоҕолоһуу чаҕылхай холобура буолар.