Саха сирэ "Всей семьей" бырайыакка көхтөөхтүк кыттар

Музыка кэрэ эйгэтэ сааланы биир гына бүрүйэр. "Музыкальная энциклопедия" симфоническай оркестр музыканнара дирижёр салалтатынан буолаары турар кэнсиэрдэригэр бэлэмнэнэллэр. Музыка эйгэтин идэ оҥостубут эдэр дирижёр Максим Ноговицын. Үлэлээбитэ үһүс сыла, кини этэринэн  кэнсиэрдэргэ долгуйуу куруук баар. Ол да буоллар ол мэһэйдииринээҕэр төттөрүтүн турукка киирэргэ көмө буолар диэн санаатын үллэстэр.

Максим Ноговицын, Г.М. Кривошапко аатынан СӨ судаарыстыбыннай филармония дирижёра: "Дирижердааһын энергия таһымыгар барар. Онон долгуйуу көстүбэт күүһү эбэр".

Дьон сэргэ мустубутун кэннэ кэнсиэр ытыс дохсун тыаһынан арыллар. Сергей Прокофьев "Петя и волк" диэн остуоруйатын сахалыыга тылбаастаан тыыннаах музыка доҕуһуоллаах толороллор. Саннытыгар үгүс уопуттаах артыыс Александр Луценко. Истээччилэргэ дорҕоонноохтук остуоруйаны ааҕан иһитиннэрэр.

Филармония үлэһиттэрэ кэнники кэмҥэ көрөөччү, истээччи ахсаана элбии турар диэн үөрэ кэпсииллэр. Сүрүн сыалбыт-сорукпут дьоҥҥо-сэргэҕэ тыыннаах музыканы, ырыаны-тойугу көҕүлээһин уонна сөргүтүү буолар диэн этэллэр.

Александр Луценко, Г.М. Кривошапко аатынан СӨ судаарыстыбыннай филармония артыыһа: "Биһиги Саха сиригэр култуураны үрдэтиэхпитин наада. Дьон-сэргэ тыыннаах музыканы истиэхтээх диэн култуура таһымын үрдэтиигэ үлэлэһэбит".

Василина Тикиянова музыка бу хайысхатын таптаан кэнсиэрдэри көтүппэккэ сылдьар. Киһи уйулҕатын таарыйар уонна ис туругун сааһылыыр диэн бэлиэтиир. Бүгүн дьиэ кэргэнинэн, оҕотун музыка эйгэтигэр сыһыарар баҕаттан илдьэ кэлбит. Үүнэн эрэр көлүөнэҕэ олус туһалаах дии саныыр.

Василина Тикиянова, Дьокуускай олохтооҕо: "Классика киһи мэйиитигэр, киһи доруобуйатыгар олус туһалаах. Онон төһөнөни кыра сааскыттан алтыһыы барар да соччонон үчүгэй".

Филармония өрөспүүбүлүкэ араас муннуктарынан эмиэ гостуруоллуур. Холобур, сотору кэминэн Майаҕа кэнсиэр тэрийиэхтээхтэр. Бу курдук Саха сирин олохтоохторо дьиэ кэргэнинэн астына дуоһуйа сынньаналларыгар, бириэмэлэрин бииргэ атааралларыгар  кыах бэриллэр.