Дьокуускай чугаһыгар таба үөрэ кыһыҥҥы мэччирэҥҥэ тохтоон турар

Көҥүл мэччийэр айылҕа оҕолоро бу сырыыга ыраата барбыттар. Онон күнүскү аһыыр кэмнэригэр кэлбэтилэр.  Онтон өр-өтөр буолбата ыраахтан табалар хобо чуорааннара лыҥкынаан тиийэн кэллилэр.

Хаһаайыстыба уопсайа 17 табалаах. Эдьигээнтэн төрүттээх, оҕо сааһа ыстаадаҕа ааспыт, Раиса Ильинова төрүт дьарыгын киин сиргэ сөргүтэргэ ылсыбыт. Нарын-намчы көстүүлээх, ол эрэн хотуулаах хоту кыыһа табаны иитиигэ баай уопуттаах. Былырыын саас бу маанылаах кыыллар Хабаровскай кыраайтан кэлбиттэр. Нелькан диэн эбэҥки нэһилиэгин бүтэһик табалара. Онон манна кэлэн иккистээн тыыннаныахтаахтар, таба төрдө буолуохтаахтар.

Раиса Ильнова, "Энэси халан" А.К. Ильнов аатынан община салайааччыта: "Аяно-Майскай  эбэҥки боруодалара. Хаан уларытарга Саха сирин ыстаадаларын кытара үлэлэһэргэ үчүгэй буолуо дии саныыбын. Хаан уларыйдаҕына таба элбиир, үөскүүр. Онон оннук эмиэ былааннаахпын инникитин".

Биһиги табаларбытыгар холоотоххо быдан төрөлкөйдөр. Атахтара уһун буолан уҥуохтара улахан итиэннэ өҥнөрө ураты. Хас биирдии таба моонньугар хобо чуорааннаах. Онон үөр иһэрэ ыраахтан иһиллэр. Бу маны кинилэр дойдуларыттан кэтэн кэлбиттэр. Нелькан ыстаадатыгар өрөбөлүүссүйэ инниттэн көлүөнэттэн көлүөнэҕэ бэриллибит алтан чуорааннар билигин Саха сиригэр чугдаараллар.

Табалар бэйэлэрэ лабыкталаан аһыыллар. Ону таһынан күҥҥэ үстэ комбикорм эбии биэрэллэр. Онон номнуо аһыыр кэмнэригэр бэйэлэрэ холкутук кэлэр буолбуттар.

Ураа лаҥкыр муостаахтары Раиса Ильинова хааны уларытыыны сэргэ хотугу аҕыйах ахсааннаах норуоттар киин сиргэ түмсэр сирдэрин оҥорор сыаллаах тутар. Онон манна төрөөбүт дойду ахтылҕанын таһаарар ыалдьыттары үгүстүк көрсүөххэ сөп. Катя Туприна Анаабырга ыстаадаҕа улааппыт. Кини оҕо сааһын аргыстарын көрсөн олус диэн үөрдэ, истиҥ түгэни хаартыскаҕа түһэн үйэтиттэ. 

Катя Туприна: "Олох үөрдүм, дуоһуйдум. Раисаҕа улахан махтал манна аҕалбытыгар. Бэйэм дойдубар сылдьыбыт курдук сананным".

Табалары Ильиннэр дьиэ кэргэнинэн көрөллөр. Аҕа сүбэһиттэрэ, сүрүн үлэһиттэрэ Раиса аҕата уонна кэргэнэ. Кинилэр  үөр иккис аҥаарын көрдүүр түбүгэр сылдьаллар. Таба лабыктаны батыһар, онтон Бүлүүлүүр суол  кытыытыгар, киһи сөҕүөх, өлгөмнүк үүнэр эбит. Онон кыстыкка ырыган үктэнэн баран бу сиргэ кэлээт тута көммүттэр.

Раиса Ильинова  "Арктика -13" диэн бырайыак иитинэн бу дьыалатын сайыннарар. Кини инникитин манна  төрүт дьарык,  култууура сайдар киинин тэрийиэхтээх.

Раиса Ильнова, "Энэси халан" А.К. Ильнов аатынан община салайааччыта: "Бырайыагым сүрүн сыала 13 Арктика оройуонун түмээһин. Ол курдук эдэр ыччаты, талааннаах дьону. Арктика -13 диэн ааттаабытым үс суолталаах, бастакы президент уонна мин бэйэм эһэм төрөөбүт күннэрэ 13 чыыһыла уонна 13 улуус". 

Табалар саҥа сиргэ толору үөрэммиттэр. Оннооҕор сотору кэминэн эбиллиини күүтэллэр, биэс табы уулаах.