Сүүс харахтаах дуобакка бастыыр иһин киирсии

Төһө да саастара кыратын иһин санныларыгар үгүс уопуттаах дуобаччыттар. Байдам Николаев бу спорт көрүҥүнэн дьарыктаммыта алтыс сылыгар барда. Номнуо дойду уонна бүтүн аан дойду таһымнаах күрэхтэһиилэргэ кыттан турардаах. Бүгүн эмиэ кыайыы өрөгөйүн тутар былааннаах. Аҕам дуобакка уһуойуоҕуттан саҕалаан тохтоло суох дьарыктанабын диэн кэпсиир.

Байдам Николаев, күрэхтэһээччи: “Дуобакка аҕам уһуйбута, ол кэнниттэн оонньуохпут баҕарбытым”.

Өрөспүүбүлүкэтээҕи күрэхтэһии  сүүс харахтаах дуобакка ыытыллар. Биир нэдиэлэ устата бастыҥнары быһааран, салгыы дойду таһымнаах күрэххэ путевканан наҕараадалыахтара.

Владимир Иванов, күрэх сүрүн судьуйата: “Оҕолорго өрөспүүбүлүкэҕэ биирдиилээн бастыыр иһин күрэх буола турар. Уопсайа 186 оҕо кэлэн кытта сылдьар. Бу 100 харахтаах дуобакка саамай улахан күрэхтэһиибит буолар. Манна кыайбыттар Россияҕа путевка ылаллар”.

Хаҥалас улууһун Уулаах Аан олохтооҕо Василий Кузьмин  үс оҕото үһүөн дуобатынан кыра эрдэхтэриттэн дьарыктаналлар. Үгүс ситиһиилэрин, оҕолоро сайдалларын көрөн үөрэ саныыр. Бүгүҥҥү күрэххэ кэлэн оҕолоругар ыалдьар уонна хас биирдии киирсиилэригэр бэйэтэ кыттарын курдук долгуйар. Дуобат өй-санаа сайдыытыгар туһата улахан диэн бэлиэтиир.

Василий Кузьмин, төрөппүт: “Үһүөн призердэр. Үксүгэр кыайыылаах кэлэллэр. Оҕо өйүн сайыннарыыга олус туһалаах спорт көрүҥэ”.

Тренердэр этэллэринэн оҕолорго дуобат таһыма Саха сиригэр күүскэ сайдан турар. Баҕалаах оҕо ахсаана сылтан сыл элбии турар. Саҥа иитиллээччилэргэ аан  куруук аһаҕас.

Айсен Андреев, 5№-дээх оҕо спортивнай оскуолатын тренерэ: “Дуобаттыыр оҕо ахсаана элбиир. Онон бу көрүҥ сайда турар. Саалабыт наар толору, сорох ардыгар миэстэ да тиийбэт буолааччы”.

Дуобакка араас таһымнаах күрэхтэһиилэр ахсааннара үгүс. Бу курэхтэһии кэнниттэн аны, олунньу 20 күнүттэн саҕалаан Россия үтүөлээх тренерэ  Николай  Кычкин   аатынан Дойду таһымнаах  күрэх буолуохтаах. Онно уопсайа  7 регионтан  кэлэн кыттыыны ылыахтаахтара.