Олунньу ый - бастакы рассаданы олордуу кэмэ

Билигин оҕуруот аһын олордооччуларга, сибэкки үүннэрээччилэргэ түбүктээх кэм. Ол курдук сиэмэ талыыта, атыылаһыыта киин болҕомтоҕо сылдьар. Маннык туһааннаах маҕаһыыннарга киһи кэлиитэ көхтөөх. Атыыһыттар бэлиэтииллэринэн, күҥҥэ ортотунан икки-үс сүүсчэкэ киһи сылдьан ааһар. Ыраах Сунтаар улууһун Кутана нэһилиэгиттэн кэлэ сылдьар Светлана Ксенофонтова өрүү биир оҥорон таһаарааччы сиэмэтин атыылаһабын диэн этэр. Сыллата Светлана Сидоровна оҕуруот аһын араас көрүҥүн, сибэкки эгэлгэтин ыһар.

Светлана Ксенофонтова, Сунтаар улууһун олохтооҕо: "Сибэкки, моркуоп, кабачок сиэмэлэрин ыллым. Сыана төһө да үрдээтэр син биир ылабыт".

Оҕуруот олордуута, биллэн турар, күүһү-уоҕу, сыраны, бүөбэйдээһини эрэйэр. Ону тэҥэ, үп-харчы эмиэ аҕыйаҕа суох барар. Аҥаардас сиэмэ, буор, уоҕурдуу, битэмиин, тэрил, иһит-хомуос, фитолампа ыларга ботуччу суумманы хаалларан тахсаҕын.

Хас биирдии сибэкки сиэмэтэ араастаһар, ампуланан, көннөрү даҕаны, сыаната көрүҥүттэн тутулуктаах, оҕуруот аһыгар эмиэ суордуттан элбэх тутулуктаах. Холобура оҕурсу, помидор, моркуоп сиэмэтин ортотунан 40- 60 солкуобайга атыылаһыахха сөп. Уоҕурдуу, үүнүүнү көҕүлүүр эбиилик эгэлгэтин дьон эмиэ хамаҕатык атыылаһар.

Любовь Фёдорова, консультант-атыыһыт: "Уоҕурдуулары хамаҕатык ылаллар. Билигин сүрүннээн помидор, биэрэс сиэмэлэрэ атыылаһаллар". 

Ыһыыга саамай сүрүнэ  буора. Буор хайаан даҕаны кумахтаах буолара наада. Маҕаһыынтан да атыылаһыллыбыт буорга кумах кутуллара ирдэнэр. Дьокуускай эргин Марха бөһүөлэгин олохтооҕо Светлана Былкова чааһынай дьиэҕэ олорор буолан оҕуруоттаах. Оҕурсу, помидор, моркуоп сыллата ыһар, буорум баар буолан хас сыл аайы эбэн эрэ биэрэбин диэн этэр.

Светлана Былкова, Марха олохтооҕо: "Буорум баар онон сыллата эбэн эрэ биэрэбин. Сыл аайы икки куулу куттахпыта сөп буолар". 

Сиэмэни талыы эмиэ туспа ымпыктардаах, хаачыстыбалаах эрэ сиэмэ учугэйдик силигилээн тахсар.

Клеопатра Давыдова, Дьокуускай олохтооҕо: "Хаачыстыба мөлтөөбүт диэн бэлиэтиибин. Тоҕо диэтэр урут барыта тахсар буоллаҕына билигин тахсан быстыбат. Тохсунньуна олордубут сиэмэлэрим улахан аҥаардара тахсыбата".

Уопуттаах оҕуруоччуттар сиэмэ түргэнник үүнэригэр көҕүлүүр араас ньымалары туһаналлар уонна бэрэбиэркэлэммит сиртэн атыылаһаллар.