Хатырыкка спортивнай-култуурнай киин үлэҕэ киирдэ

82

Үрдүк Айыылартан көрдөһөн, алгыс тылын иҥэринэн Хатырык нэһилиэгэр култуура уонна спорт киинэ арыллар. Үөрүүлээх тэрээһин дьоро күнүгэр үгүс киһи тоҕуоруһа мустан нэһилиэк историятыгар көмүс суругунан тиһиллэр бэлиэ күнү уруйдууллар.

Сахалыы чороонноох үҥкүүнэн Хатырык нэһилиэгин кэнэҕискитэ, үүнэр көлүөнэтэ, кэнчээри ыччата саҥа арыллыбыт култуура дьиэтин бастакы хараҥаччылара буолан эҕэрдэ нүөмэри көрдөрдүлэр. Толору көрөөччүнэн туолбут саала ытыс тыаһын харыстаабакка таһынна. Сүүнэ улахан дьиэлэммит олохтоохтору Ил Дархан Айсен Николаев эҕэрдэлээтэ.

Айсен Николаев, Ил Дархан: «Тыа сиригэр, тыа нэһилиэгэр тарбахха баттанар бэртээхэй сөптөөх дьиэ – уот тутуллан үлэҕэ киирбититтэн киһи үөрэр».

Бу киини нэһилиэк олохтоохторо күүппүттэрэ ыраатта. Саҥа тутуллубут баараҕай эбийиэк 2,5 тыһыынча кыбадыраатынай миэтэрэ иэннээх буолла. Нэһилиэк олохтоохторун бары араҥата сылдьарыгар ананан оҥоһулунна.

Артур Ноговицын, Хатырык нэһилиэгин баһылыгын эбээһинэһин толорооччу: «Бу эбийиэккэ түөрт тэрилтэ киириэхтээх. Ол курдук саалата 150 миэстэлээх култуура дьиэтэ, 36 киһи тэҥинэн кэлэн дьарыктанар спорт саалата, олохтоох библиотека уонна искусство оскуолатын музыкаҕа салаата».

Нэһилиэк 900-тэн тахса ааҕааччылаах библиотеката бу дьиэҕэ эмиэ көһөн киирдэ. Оҕону ааҕарга угуйууннан эрэ буолбакка, бүтүн нэһилиэк дьонугар туһуламмыт элбэх өҥөлөөх толору хааччыллыылаах дьиэни ылан үөрүүлэрэ үгүс. Библиотекаҕа 15 тыһыынчаттан тахса кинигэ харалла сытар.

Татьяна Местникова, Хатырык нэһилиэгин библиотекатын сүрүннүүр исписэлииһэ: «Манна оскуола саастаах оҕолорго уонна улахан дьоҥҥо ааҕар саалалары таһынан кыра саастаах оҕолорго аналлаах саалалаахпыт. Кинигэ уларсар сир туһунан баар, 11 тыһыынча пуондабытын харайарбытыгар хранилище баар».

Саха сиригэр бүтэһик биэс сылга 45 култуура эбийиэгэ тутулунна. Манна култуура дьиэлэрэ, кулууптар уонна библиотекалар киирсэллэр. Итиэннэ 19 эбийиэккэ хаттаан өрөмүөн үлэтэ барбыт. Материальнай хааччыллыы өттүнэн үгүс үлэ ыытыллыбыт.

Айсен Николаев, Ил Дархан: «Хайа баҕар өттүттэн толору хааччыллыылаах. Мин көрдөхпүнэ, бырайыага олус табыгастаах буолбут. Инникитин атын да нэһилиэктэргэ, улуус кииннэригэр маннык кииннэри тутууга туһаныахха сөп».

Өссө да инникитин култуура, спорт эбийиэктэрэ тыа сирдэригэр тутуллан, нэһилиэнньэ олоҕо табыгастаах буоларыгар туһуламмыт өрөспүүбүлүкэ уонна федеральнай хааһынаттан үбүлэммит баараҕай тутуулар барар чинчилээхтэр. Онуоха туоһунан бу курдук сүүнэ улахан дьиэлэр буолаллар.