Саха тыйаатыра икки ыйдаах гостуруолга бэлэмнэнэр

73

10-ча сыл буолан баран хоту дойду сыанатыгар. Саха тыйаатыра  Дьааҥы, Орто Халыма, Өлөөн, Анаабыр  улуустарынан улахан гостуруолга бараары бэлэмнэнэр. 3 оройуоҥҥа труппа сылдьыбыт эбит буоллаҕына, Орто Халымаҕа аан бастакы сырыылара. Уопсайа 6 нэһилиэккэ, үс испиктээкили көрдөрүөхтэрэ.

 

Семён Алексеев,П.А. Ойуунускай аатынан Саха театырын артыыһа: "Гастролга «Олох дьэбэрэтэ», “Кэргэн кэпсэтии”, “Кустук” испиктээкиллэри көрдөрүөхтүт. Хас биирдии нэһилиэккэ хоно сытан иккилии туруорууну көрдөрөбүт".

 

Хоту эҥэр самолетунан айанныыр буолан, артыыстар  реквизиттэрин сиринэн ыытарга бэлэмнииллэр. Үлэ сыанаҕа эрэ буолбакка сыана кэтэҕэр эмиэ күөстүү оргуйар. Сыанаҕа онньонуохтаах араас малы-салы, таҥаһы-сабы артыыстар бэйэлэрэ бэлэмнииллэр. Өлөөн уонна Анаабыр эҥэр турунуохтаах Дьулустаан Семенов хомунуу үлэтин үгэнигэр сылдьар.

 

Дьулустаан Семёнов, П.А. Ойуунускай аатынан Саха театырын артыыһа: "Барытын бэйэбитт тийэбит сүөкүүбүт, сыанабытын эмиэ бэйэбит туруорабыт. Сирэйбитин бэйэбит гриимнэнэбит. Гостуруолга үксүн оннук буолар".

 

Өскөтүн Өлөөн уонна Анаабыр улуустарынан сылдьыахтаах труппа реквизиттарын ыытаары дьэ бэлэмнии сылдьар буоллахтарына, Дьааҥы улууһугар барыахтаах бөлөх номнуо сиринэн ыыппыт. Аны көрдөрүөхтээх айымньыларын чочуйуу үлэтигэр дириҥник умсаллар.

 

Иннокентий Луковцев, П.А. Ойуунускай аатынан Саха театырын артыыһа: "Семен Ермолаев – Сиэн Өкөр “Сайылык” диэн киинэ сценарийынан Сергей Потапов испиктээкил туруорбута. Ону илдьэ барыахпыт уонна Валентин Красногоров “Таптаа миигин, таптаа” диэн комедияны көрдөрүөхпүт. Олунньу 19 күнүттэн муус устар 20 күнүгэр диэри гостуруоллуу барыыры хомуна сылдьабыт".

 

Хоту улуустары таһынан биир бөлөх Таатта улууһугар айанныаҕа. П.А. Ойуунускай 130 сыллаах үбүлүөйүнэн сибээстээн, Саха тыйаатыра улуус бары нэһилиэктэринэн биир ый устата сылдьар былааннаах. Ойуунускай айымньыларыттан хомуллан оҥоһуллубут испиктээкили уонна Карел Чапек ийэ туһунан драматын сыанаҕа дьүһүйүөхтэрэ.

 

Илья Стручков, П.А. Ойуунускай аатынан Саха театырын артыыһа: "Быйыл дойдубутугар Дьиэ кэргэн сыла, өрөспүүбүлүкэбитигэр Оҕо саас сыла, оттон Тааттаҕа Эрэл, таптал, итэҕэл сыла биллэриллибитинэн Ойуунускай “Оҕоҕо баҕарбыт” айымньытыгар олоҕуран кини оҕоҕо анаммыт айымньыларын түмэр туорууну көрдөрүөхпүт".

 

Хамсык кэмэ ааһан тыйаатыр улуустар кииннэрин эрэ буолбакка, кыра бөһүөлэктэрин кэрийэр үтүө үгэстэрин сөргүттэ. Сүрүн труппа айаҥҥа сылдьар кэмигэр тыйаатыр истиэнэлэрэ син биир чуҥкуйбаттар. Манна өрөспүүбүлүкэ норуот тыйаатырдара кэлэн киин куорат олохтоохторугар араас испиктээкиллэри көрдөрүөхтэрэ.