Быйыл Дьокуускайга 700 тахса ыал гааска босхо холбонуо

Гаас үлэһиттэрин тоһуттар тымныылар да, хойуу туманнаах да күннэр самнарбаттар. Бэриллибит болдьоҕу баттаһа күннээҕи үлэлэрин түбүгэр сылдьаллар. Быйылгы сылга гаас үлэһиттэригэр тутуу кэмэ саҕаланан, аны  күһүҥҥэ диэри күүстээх үлэлэр күүтэллэр. Бу учаастакка өссө биир дьиэ күөх төлөҥҥө холбоноору бэлэмнэнэр. «Социальнай гаастааһын» бырагыраамаҕа хапсан, бэдэрээччит үлэтин түмүктээн, аны билигин «Сахатранснефтегаз» тэрилтэ күөх төлөнү биэрии үлэтин ыытар.

Андрей Степанов, "Сахатранснефтегаз" АУо Хатас нэһилиэгин учаастагын маастара: «Күн бүгүн биһиги биэс эбийиэктээхпит. Барыта бэлэм сыталлар. Билигин бу бастакы дьиэбитин саҕалаатыбыт. Биригээдэбитигэр биир сварщик уонна икки слесарь, биир маастар бааллар».

«Социальнай гаастааһын» бырагыраама дойдубут президенэ Владимир Путин көҕүлээһининэн  аҕыйах сылтан бэттэх тэтимнээхтик ыытыллан саҕалаабыта.  Сыллата Сахабыт сиригэр тыһыынчанан дьиэ гаас ситимигэр босхо холбонор. Күөх төлөн баар нэһилиэнньэлээх пууннарыгар элбэх оҕолоохтор, кыра дохуоттаах уонна нэһилиэнньэ араас социальнай араҥатыгар киирсэр дьон хапсыахтарын сөп. Кинилэр дьиэлэригэр диэри босхо күөх төлөн утаҕын таттаран гаас ситимигэр холбонор кыахтаналлар.

Фёдор Неустроев, "Сахатранснефтегаз" АУо күөх төлөн ситимин тарҕатар салалта хаттаан тутуу салаатын салайааччыта: «Социальнай гаастааһын дойду президенэ Владимир Путин уурааҕынан саҕаламмыта. Онтон 2021 сыллаахха балаҕан ыйыгар СӨ бырабыыталыстабытан уурааҕа тахсыбыта. Онтон ыла социальнай гаастааһын үлэтэ саҕаламмыта».

Аҥаардас ааспыт сыл түмүгүнэн 3550 гаас турбата оҥоһулунна, 117 килэмиэтир усталаах ситим тардылынна уонна 2907 дьиэ күөх төлөҥҥө холбонно. Бу Уһук Илиҥҥи уокурукка бастыҥ көрдөрүү буолар. 

Дьокуускай куоракка уонна чугаһынааҕы нэһилиэктэргэ бу сыл бүтүөр диэри 703 дьиэҕэ тустаах бырагырааманан гаас ситимэ тардыллыа. Онтон Саха сиригэр 2030 сылга диэри 15 тыһыынча дьиэни күөх төлөнүнэн босхо хааччыйыахтара.

Гаас ситимэ саҥа тутулла турар кыбаарталларга эмиэ тэтимнээхтик киирэр. Күөх төлөн утаҕын туһанааччылар сыллата элбииллэр. Эһиилги былаан эмиэ нэһилиэнньэ үгүс араҥатын хабар сыаллаах.

Фёдор Неустроев, "Сахатранснефтегаз" АУо күөх төлөн ситимин тарҕатар салалта хаттаан тутуу салаатын салайааччыта: «Быйыл 84 килэмиэтир гаас ситимэ тардыллыахтаах. Былаан быһыытынан 1800 тахса ыал холбонуохтаах».

Билиҥҥи туругунан «Социальнай гаастааһын» бырагыраама 2030 сылга диэри сыал-сорук ылынан олорор. Онуоха диэри 15 тыһыынчаттан тахса ыалы хабыахтара.