Хатастар төрөөбүт төрүт тыл харыстабылыгар тураллар

Виктория Иванова култуура коллеһын иккис кууруһун устудьуона. Кини практикатын "Тускулга" ааһа сылдьар. Олунньу 13 күнүгэр Хатас араас ансаамбылларын мунньан "Тыыннаах сахам тыла" диэн оҕолорго анаан улахан тэрээһини ыытыахтаах. Дипломнай үлэтигэр оҥорбут үлэтэ бигэ тирэх буолуо диэн эрэнэр.

Виктория Иванова, култуура коллеһын иккис кууруһун устудьуона: «Онно кытталлар: 10Б кылаас үөрэнээччилэрэ, Дьэ-Буо, Дэгэрэҥ түмсүүлэр уонна үҥкүү, ырыа ансаамбыллара».

Хатас нэһилиэгэр төрөөбүт төрүт тылы харыстааһын уонна сайыннарыы үлэлэрэ күн өрөбүлэ суох бараллар. Холобур "Тускул" култуура дьиэтин үлэһиттэрэ кыра оҕоттон саҕалаан кырдьаҕаһыгар тиийэ дьону-сэргэни үлэлэригэр кыттыһыннаран сахалыы тыын эйгэтин үөскэтэллэр. Татьяна Окорокова араас саастаах олохтоохтору ырыаҕа уһуйар. Кини этэринэн сахалыы ырыа сүрүннээн кырачаан оҕолор тылларын сайыннаралларыгар олус туһалаах.

Татьяна Окорокова, "Тускул" култуура киинин хормейстера: «Ырыаны үөрэтэргэ аан маҥнай тыллары үөрэтэртэн саҕалыыбыт. Саха ырыаларын үөрэтэн тылларын баайа элбиир. Үөрэтиэм иннинэ ырыа ис хоһоонун билэллэр».

Саха тылын сүрүн баайа-дуола биллэн турар олоҥхоҕо хатанан сытар. "Тускул" култуура дьиэтин сыанатыгар Сергей Зверев, Сергей Борогонскай курдук улуу дьон олоҥхолорун туруораллар. Үлэһиттэр этэллэринэн олоҥхо тыл-өс, духуобунас сайдарыгар улахан кылааты уурар.

Евдокия Семенова, Хатас норуодунай тыйаатырын режиссера: «“Театр детям” диэн бырагыраамалаахпыт, ол чэрчитинэн Олоҥхо күнүгэр оҕолору ыҥыраммыт олоҥхо ааҕан, тойуктаан иһитиннэрэбит».

Хатас нэһилиэгэр араас түмсүүлэр, ансаамбыллар ахсааннара үгүс. Олохтоохтор олус көхтөөх буоланнар култуура дьиэтигэр олох куруук күөстүү оргуйар. Николай Протасов "Дэгэрэҥ" түмсүүтүн салайааччыта. Кини үгүс киһини ырыаҕа уонна сүрүннээн дэгэрэҥҥэ дьарыктыыр. Кини уһуйуллааччыта Зоя Баишева бу ураты ырыа хайысхатын туһунан санаатын бу курдук үллэстэр.

Зоя Баишева, "Дэгэрэҥ" түмсүү ырыаһыта: «Дэгэрэҥ диэн мин санаабар, саха норуотун түҥ былыргыттан өбүгэбит тыынын илдьэ сылдьар. Аныгыны кытта силбэһэн кэлэр көлүөнэҕэ тириэрдэрбитин олус туһалаах дии саныыбын».

Ону таһынан ааҕааччылар күрэхтэрин үгэс быһыытынан уон сыл устата ыыталлар. Кэнники сылларга кыттааччы ахсаана лаппа улаатан эрэр диэн үөрэ саныыллар.

Евдокия Семенова, Хатас норуодунай тыйаатырын режиссера: «10-тан тахса сыл ааҕааччылар күрэхтэрин ыытабыт. Кыраттан аҕа саастарыгар дылы күрэххэ кытталлар. Түгэнинэн туһанан күрэххэ кыттыҥ диэн ыҥырабын».

Хатас нэһилиэгэр төрөөбүт төрүт тылы, сахалыы эйгэни сайыннарарга үгүс үлэлэр бараллар. Ону тэҥэ "Тускул" култуура дьиэтин үлэһиттэрэ cүҥкэн кылааттара үгүс, салгыы даҕаны күн өрөбүлэ суох үлэ үгэниттэн тахсыбакка, үлэлиир-хамсыыр былааннаахтар.