Хаарбах дьиэттэн көһөрүү бырагыраама салҕанар

Киин куоракка Губин аатынан уулусса мас дьиэлэрин көтүрүү саҕаламмыт. Онтон бу сыл муус устар маҥнайгы күнүгэр диэри Дьокуускайга көһөрүү бэрээдэгэ чопчуланыахтаах. 

Онтон тохсунньу уонна олунньу ыйдарга көһөрүү бырагырааманан Нам, Мэҥэ хаҥалас, Уус Майа уонна Ленскэй улуустарыгар хаарбах дьиэттэн саҥа кыбартыыраларга көстүлэр. Мэҥэ Хаҥаласка 2-с Наахара нэһилиэгэр 3 мэндиэмэннээх 23 кыбартыыралаах дьиэ үлэҕэ киирдэ. Манна сүрүннээн сопхуос, колхуос, үлэтигэр сылдьыбыт, тыа хаһаайыстыбатын сайдыытыгар үлэлэспит кырдьаҕастар толору хааччылыылаах кыбартыыраларга көстүлэр. Туһааннаах бырагыраама Ньурба улууһугар эмиэ тэтимнээхтик үлэлиир. Манна ахсынньыга 135 ыал малааһыннаабыта, онтон бу сотору кэминэн биир дьиэ киирэрэ күүтүллэр.

Марина Фёдорова, дьиэ-уот тутуутун олоххо киллэрии салаатын салайааччыта: «Хаарбах дьиэттэн көһөрүү бырагырааматынан Ньурба улууһугар 29500 кв.м. 1750 киһи көһүөхтээх. Ол курдук 2022 сыл чэрчитинэн Ньурба куоракка Комсомольскай уулуссаҕа 3 элбэх кыбартыыралаах дьиэ үлэҕэ киирдилэр. 53 уонна 58 кыбартыыралаах дьиэни “Региональное развитие” уонна 30 кыбартыыралаах дьиэни “Нидстрой” тэрилтэлэр тутан киллэрдилэр. Бу дьиэлэргэ 7500 кв.м. 473 киһи көһөн киирдэ. Ону таһынан биир элбэх кыбартыыралаах дьиэ тутуута бара турар».

Хаарбах дьиэттэн көһөрүү бырагыраамата 2019 сылтан Саха сиригэр былааннаахтык ыытыллар. Ол курдук бу сыллар усталарыгар барыта 615 тыһ. кв.м. үлэҕэ киирэн 32 тыһ. киһи олорор усулуобуйатын тупсарда. Саамай элбэх тутуу былырыын барда.

Игорь Алексеев, СӨ олорор дьиэни-уоту тутуу дирекциятын бырагыраамалары олоххо киллэрии салаатын салайааччыта: «2023 сылга улуустарынан бырытынан 60 элбэх кыбартыыралаах дьиэ киирдэ. Уонна бу сыл бастакы кыбаарталыгар өссө 51 дьиэ киирэрин күүтэбит. Ол дьиэлэр киирдэхтэринэ номнуо 700 тыһ. кв.м. тахса көһөр 2019 сылтан. 2024 сылга биһи тус сыаллаах көрдөрүүбүт 300 кв.м. курдук буолар».

Ити ыйыллар сорукка быйыл бүддьүөттэн 17 миллиард көрүллүбүт. Бу бырагыраама түһүмэҕинэн ыытыллар. Билигин иккис уочаракка киирбит дьиэлэри көһөрүү ыытыллар, ол эбэтэр 2017 сылга диэри хаарбах испииһэгэр киирбиттэргэ.  Бу ыйга 11 элбэх кыбартыыралаах дьиэ үлэҕэ киирэрэ күүтүллэр. Ол курдук Сунтаарга, Өлүөхүмэҕэ, Зырянкаҕа, Чурапчыга, Томпоҕо уонна Мэҥэ Хаҥаласка. Онтон үһүс түһүмэх уочарата күннэтэ хаҥыыр. Ол курдук бүгүҥҥү күҥҥэ 3000 тахса дьиэ аварийнай туруктаахха киирбит.