«Саа туһунан» федеральнай сокуоҥҥа уларыйыылар киирдилэр

Лицензиялыыр-көҥүллүүр киин тобус толору. Ким саа ылаары докумуон сырсар, ким болдьоҕун уһатаары уочараттыыр. "Саа туһунан" федеральнай сокуоҥҥа кэккэ уларыйыылар киирдилэр. Ол курдук бу сылтан сайабылыанньа 20 хонугунан көрүллэр буолла. Эрдэ ый устата диэн этэ. Онон билигин биллэ түргэтээтэ. Сааларын болдьоҕун тэҥнии кэлбит. Бу уларыйыы ааспыт сылга киирбит, бу уларыйыыны саалаах дьон олус диэн биһирээбиттэр. 

Николай Новиков: «Саҥа саа ылбытым, онтукабар көҥүл ылабын уонна эргэ саабын кытта болдьоҕун тэҥниибин. Икки сылынан эмиэ кэлбэт курдук. Эрдэттэн Госуслуганнан суруттарбытым, хаска кэлэрбин быһаарыммытым».

Бу сылтан суол быраабылатын кэһии ыстараабын болдьоммут кэмигэр төлөөбөтөх туһунан биир боротокуол оҥоһуллубут буоллаҕына саа былдьаммат буолла. Оннук боротокуол сыл иһигэр иккитэ туоллаҕына диэҥҥэ уларыйда. Онтон бастакытын саа - саадах ылынааччы ааспыт сылга киирбит сүрүн уларыйыылары тутуһар.  

Николай Стручков, Росгвардия Саха сиринээҕи салалтатын лицензиялыыр-көҥүллүүр үлэ киинин саа эргиирин хонтуруоллуур салаатын аҕа иниспиэктэрэ: «Билигин МВД уонна ФСБ бэрэбиэркэтин ааһар. Хааччах баар буоллаҕына икки сыл иһигэр ылар кыаҕа суох. Сүрүн уларыйыы медосмотру ааһыыга киирдэ. Урут учуотка турбат эрэ диэн буоллаҕына, билигин тест ааһаллар уонна анаалыс туттараллар».

Саха сиригэр күн бүгүн 73 тыһ. киһи саалаах, баларга 166 тыһ. сэп-сэбиргэл учуокка турар. Ааспыт сылга ирдэбили кэһии 3000 тахса түгэнэ тахсыбыт. Манна 5045 саа былдьаммыт. Ирдэбил сүрүннээн бу булт тэрилинэн ыар буруйу оҥорууттан кытаатар.

Николай  Иванов, Росгвардия Саха сиринээҕи салалтатын лицензиялыыр-көҥүллүүр үлэ киинин саа эргиирин хонтуруоллуур салаатын аҕа иниспиэктэрэ: «Саалаах быһылаан Саха сиригэр эрэ буолбат. Былырыын биһиэхэ сыл түмүгүнэн 55 саанан улахан сокуону кэһии таҕыста: өлөрүү, өлөрүүнэн куттааһын, күлүгээннээһин, браконьердааһын. Кэлиҥҥи кэмҥэ сокуону кэһэр булчуттар элбээтилэр».

Уотунан эстэр сэп хонтуруола онон кытаанах. Холобура, ааспыт сылга 7 саа уоруллубут, оттон 28 сүппүт. Маныаха бас билээччилэр туһааннаах миэрэҕэ тардыллыбыттар. Олорор сир уларыйыыта күүскэ учуоттанар. Холобура, билигин Автодорожнай уулуссаны Михаил Николаев проспегар көһөрүү кэннэ ыйытыы үгүс.

Роберт Романов, Росгвардия Дьокуускайдааҕы лицензиялыыр-көҥүллүүр үлэ киинин саа эргиирин хонтуруоллуур салаатын  иниспиэктэрэ: «Автодорожнай уулуссаҕа олорор саа хаһаайыттара регистрацияҕытын паспортнай остуолга уларыттаххытына 14 күн устата биһиэхэ биллэриэххитин наада».

Үгүстэр сааланаары докумуон сырсар буоллахтарына, сорохтор төптөрү сааларын туттараары кыһаллаллар. Дьон хото эргэ сэбиргэллэрин харчыга биэрэллэр.