Уус-Алдан уустара маастар-кылаастары ыыталлар

Норуот маастардара туос иһити оҥоруу сүрүн кистэлэҥнэрин арыйаллар. Екатерина Васильева Уус-Алдан Бээрийэ нэһилиэгин «Арчы» түмсүү маастара. 11-с сылын туос иһити оҥоруунан дьарыктанар. Хатыҥ туоһун туох баар сиэри туому тутуһан хастыыллар, онон туос уһун үйэлээх, айыыһыт сиэрдээх буолар. Иһити оҥоруу сүрүн кистэлэҥин туһунан маастар кэпсээтэ.

Екатерина Васильева, «Арчы» айар түмсүү чилиэнэ: «Туос оҥоһук оҥоруутугар сүрүн кистэлэҥнэр буолаллар - туоһу хайдах харайарын уонна сабы хайдах хатарарын. Төһөнөн үчүгэйдик сап хатаҕын даҕаны, соччонон үчүгэй хаачыстыбалаах иһит буолан тахсар.»

Быыстапкаҕа 60 норуот маастарын 100 тасха үлэтэ көрдөрүүгэ турда. Чабычахтар, тууйастар ыаҕыйалар, оннооҕор саха кыыһын хаппахчатыгар тиийэ баар. Норуот маастара Екатерина Колодезникова салайааччылаах «Оһуор утум» түмсүү бу хаппахчаны 2018 сыллаахха оҥорбуттара.

Матрёна Герасимова, СӨ норуотун маастара: «Кыыс хаппахчатын аана икки өттүлээх. Хаппахча миллиметригэр тиийэ Мандар Уус ньыматын, эскиһын тутуһан туран оҥоһуллубута. Иһигэр сүлүүдэлээн, иҥиир сабынан, кылынан тигэн уонна да атын былыргы ньыманы туттан оҥорбуттара.»

«Мындыр» түмсүү Уус-Алданнааҕы олоҥхо дьиэтин иһинэн тэриллэн үлэлиир. Куруһуок иһинэн 19 СӨ норуотун маастара, 23 уус-уран оҥоһук маастара, 52 Уус-Алдан улууһун маастара баар. Сыл аайы улууска 3-5 саҥа маастар хамыһыйа быһаарыытынан эбиллэр. Дьокуускайдааҕы художественнай училище устудьуоннара кэлэн, үөрүйэхтэрин сайыннаран бардылар. Улуус-улуус атын тиэхиникэни туһанарын көрөн, сүрүн араастаһыыларын бэлиэтээтилэр.

Надежда Корнилова, Дьокуускайдааҕы художественнай училище учуутала: «Бу Уус-Алданнар үлэлэрэ, бу Таатталар үлэлэрэ, бу Амма улууһун үлэтэ диэн киһи көрөн билэн араарар. Онтуката буочардарыгар сытар. Буочардара диэн сииктэрин хайдах тигээһиннэрэ, саптарын хайдах хатааһыннара уонна хас биирдии оһуор быһыллыыта маастар аайы эмиэ атын атын буолар»

Өрөспүүбүлүкэ норуотун маастара былыргы саха кыыһын баайын аҥаардас биир малын көрөөт быһаарыахха сөп диир. Ол сүктэр кыыс маллаах иһитэ. Бастакы улахан иһитигэр кыһыҥҥы бууктаах соно хараллар, орто иһитигэр солко ырбааҕы ууруллар уонна үһүс кыра иһитигэр 32 киилэттэн ордук үрүҥ көмүс киэргэлэ хараллар. Маннык курдук саха төрүт искусствотын, дьарыгын сөргүүтүнэн дьарыктанар Уус-Алдан олохтоохторо куорат дьонугар төрүт ииһи тарҕата кэллилэр.