Горнай улууһугар иистэнньэҥнэр аһаҕас айар эйгэлэрэ арылынна

Бу күннэргэ Бэрдьигэстээххэ урбаан инкубаторын дьиэтигэр Өрөспүүбүлүкэ Ил Дарханын грааныгар кыайбыт бырайыак  "Создавай"  айар эйгэ иис хоһо олоххо киирэр үөрүүлээх арыллыыта буолла.   Бырайыагы урбаанньыт Диана Барашкова улууска биллэр проектаныын Семен Семеновтыын ааспыт сылга суруйан көмүскээбиттэр. Манна саҥа профессиональнай иистэнэр массыыналары туһанан ким баҕалаах кэлэн харчы төлөөн бэйэтэ иистэнэр кыаҕа үөскээтэ.

Ксения Васильева, Бэрдьигэстээх нэһилиэгин баһылыга: «Ил Дархан грааныгар бэйэтэ кыттан, ол иһин эргиэн инкубатора Сардаҥа түөолбэҕэ турарынан, манна олорор дьоннор кэлиэхтэрэ диэн түөолбэ салайааччытын кытта Любовь Иевнаны кытары сүбэлэһэн киниэхэ бырайыак суруйарыгар Семен Олегович көмөлөһөн, хамаанда буолан кыттаннар 462 тыһ. сууммалаах грааны ыллылар».

Мииринэйтэн кэлбит кийиит кыыс Диана 2021 сыллаахха социальнай хантараагынан 250 тыһ. солк. ылан, иискэ бэйэ дьыалатын тэринэн саҕалаабыт, ол кэннэ 2022 сылга эдэр урбаанньыттарга анаммыт грааҥҥа кыттан 400-тэн тахса тыһ. солк. эбии тиксэн, эргиэнин кэҥэтэн  икки үлэһиттэммит.

Диана Барашкова, урбаанньыт, "Создавай" айар эйгэ салайааччыта: «Бастаан саҕалыырбытыгар 2021 сыллаахха соцхантараак ылбытым. Онно кыракый 19 кв.м. бэйэм олорбутум. Онтон граан ылбытым 2022 сыллаахха. Ол кэннэ атахпар турдум диэн икки иистэнээччилэри үлэҕэ ылбытым, номнуо кэҥэтиигэ барбыппыт эбии анал оборудование ылан. Аһаҕас айар эйгэни дьоннору, биир санаалаахтары муһаары арыйбыппыт. Үчүгэйдик үлэлиэхпит диэн эрэнэбин».

Эдэр иистэнньэҥ үлэлэрин улууска номнуо сыаналаатылар, холобур Сэмэн уонна Соппуруон Даниловтар ааттарынан Духуобунас киинэ ааспыт сыллаах улуус ыһыаҕар битииһиттэргэ анаан 9 уолга уонна 7 кыыска ону тэҥэ алгысчыкка таҥастарын тиктэрбит, оттон кулун тутарга туруохтаах Сэмэн Данилов “Кыраһа суруга” хоһоонугар олоҕурбут оҕолор музыкальнай испиктээктэригэр 11 көстүүмү сакаастаабыттар.

Анастасия Васильева, Семён уонна Софрон Даниловтар ааттарынан Духуобунас киинин уус-уран салайааччыта: «3 чооруос чыычаах баар буолар, кинилэр таҥастара. Куобах таҥаһа баар, кулгаахтаах, кутуруктаах. Мантыкабытын холбоһуктаах гына толкуйдаабыппыт. Холобура былааччыйалар эбии иилиллэр сээкэйдэрин уһуллахха туспа туттуохха сөп».

Бу курдук суохтан баары оҥорор эдэр кэскиллээх урбаанньыт былааннара өссө да иннигэр, оттон быйылгы сыл улууска урбаан сыла биллэриллэн маныаха араас хайысхалаах үлэлэр барыахтара, чахчыта да тыа сирэ туруктаах буолуутугар, экономиката бөҕөргүүрүгэр үбү эргитэр, үлэни тэрийэр урбаанньыттар оруоллара улахан.