Шорт-трек көрүҥҥэ Саха сирин хамаандата үгүс ситиһиилээх кэллэ

Саха Сирин эдэр спортменнара, шорт-трек көрүҥүнэн дьарыктанар хамаанда Усурийскай куораттан элбэх ситиһиилээх кэллэ. Регионнар икки ардыларынан Россия таһымнаах күрэххэ кыттан  оҕолор уопсайа 11 мэдээлли  түөстэригэр кэттилэр. Бу ситиһии оҕолорго, төрөппүттэргэ, тренердэргэ үгүс үөрүүнү аҕалла.

Станислав Никитин, шорт-трек көрүҥ тренера: "Эстафетаҕа 10-12 саастаах кыргыттарга бастакы миэстэ буолбуппут. Онтон уолаттар иккис. Маны сэргэ биирдиилээн дистанцияларга иккис, үһүс миэстэлэри ыллылар".

Шорт-трек атын көрүҥнэргэ холоотоххо саҥа көрүҥ. Олимпийскай оонньууларга 1992 сыллаахха биирдэ киирбитэ. Спорт саҥа хайысхатын сэргээн элбэх оҕолоох аҕа Григорий Васильев кыра уолун "Эллэй Боотур" спорт комплекска сырытыннарар. Хас биирдии дьарыгын илэ хараҕынан көрөр. Аны кэлэр сылтан саҕалаан күрэхтэһиилэргэ ситиилээхтик кыттыа диэн бигэ эрэллээх. Төрөппүттэргэ оҕолоргутун ыытыҥ диэн сүбэлиир

Григорий Васильев, төрөппүт: "Элбэх оҕо бу көрүҥүнэн дьарыктанарын баҕарабын. Таҥастара, хаҥкылара олус удамыр сыаналаах".

Оҕолор бэйэлэрэ даҕаны олус сөбүлээн туран дьаныардаахтык дьарыктаналлар. Сорохторо номнуо Россия таһымнаах күрэхтэргэ үгүс ситиһиилэрдээхтэр. Кырачаан оҕолор улахан убайдарын, эдьийдэрин холобур оҥостор буоланнар эмиэ инникитин спорт эйгэтигэр былааннара киэҥ.

Тренердар этэллэринэн шорт-трек көрүҥ Саха сиригэр сайдар кыахтаах.  Баҕалаах оҕо ахсаана сылтан сыл элбии турар. Саҥа иитиллээччилэргэ аан  куруук аһаҕас.

Станислав Никитин, шорт-трек көрүҥ тренера: "Үлэ күннэригэр симиэнэн дьарыктар ыытыллаллар. Ол курдук сарсыарда өттүгэр уонна эбиэт кэннэ 3 чаастан".

Оҕо этэ-сиинэ сайдарыгар бу көрүҥ олус табыгастаах. Онон оҕолорун дьарыкка ыыппыт төрөппүттэр кырачааннара үүнэ-чэчирии сылдьалларын көрөн үөрүүлэрэ үгүс.

Бу көрүҥ түргэн ускуораһы, сымса хамсаныылары эрэйэр. Ол иһин киһини эчэйииттэн харыстыыр анал таҥас-сап ирдэнэр.  Кевлар матырыйаалтан комбенезон, шлем, наколенник, налокотник, ону таһынан анал атах таҥаһа дьарык кэмигэр булгуччулаах.

Шорт-трек төһө да саҥа көрүҥ  буоллар аан дойду үрдүнэн үгүс сэҥээриини ылар.  Үүнэн эрэр саха оҕолоро аан дойду таһымнаах күрэхтэргэ сотору кэминэн үгүс чыпчааллары, кыайыы өрөгөйдөрүн тутуохтара турдаҕа.