Балтараа тыһыынча волонтер анал байыаннай дьайыыга көмөнү оҥорууга кыттар

Биир кэлим суһал ыстаап иккис сылын тиһигин быспакка үлэлиир. Бүгүҥҥү күҥҥэ балтараа тыһыынча кэриҥэ волонтер баҕа өттүнэн күүс-көмө буолар. Күннэтэ ким баҕалаах кэлэн үлэҕэ кыттыһыан сөп. Варвара Пестерева манна нэдиэлэҕэ биирдэ кэлэн көмөлөһөн илии-атах буолар.

Варвара Пестерева, Дьокуускай олохтооҕо: "Айылҕа чугас соҕус гына баайа сатыыбыт. Оннук өҥнөрү талабыт. Мин нэдиэлэҕэ биирдэ кэлэн үлэлиибин, иллэҥ кэммэр. Манна иккилии сыл тохтообокко үлэлии сылдьар дьон бааллар. Үксүн песиялаахтар сылдьабыт. Сиэккэни өрүү бэйэтэ эмиэ айар дьоҕуру уһугуннарар үлэ. Өҥү дьүөрэлээһин, айылҕаҕа чугаһатыы ирдэнэр".

Нэдиэлэҕэ ортотунан икки маннык улахан сетканы баайан бүтэриэхтэрин сөп. Ол эрээри ол төһө киһи кэлэн көмөлөһөрүттэн тутулуктаах. Маны тэҥэ билигин баайарга таҥас тиийбэтэ үлэни атахтыыр. Онон биирдиилээн дьону, тэрилтэлэри күүс-көмө буоларга ыҥыраллар.

Мария Емельянова, СӨ саллаат ийэлэрин кэмитиэтин бэрэссэдээтэлэ: "Нэһилиэктэр, улуустар бары тигэллэр. Уолаттар ыарахан кэмнэригэр күүс – көмө буолалларыттан “Саллааттар ийэлэрэ” кэмитиэт киэн туттабыт, махтанабыт, сүгүрүйэбит".

Суһал ыстаап 2022 сылтан саҕалаан уопсайа 85 туоннататтан тахса таһаҕаһы тиксэрэн турар. Аҥаардас ааспыт нэдиэлэҕэ биир туонна аҕыс сүүс киилэ көмө гурууһу ыытан тураллар. Күннэтэ ыстаапка түбүк тиһигин быспат, баһыылка хомуйуута, наардааһына, иистэнии.

Анна Ефимова, "Саха сирэ эйиигин кытта!" түмсүү бэрэссэдээтэлэ: "Хас да хайыханан үлэ барар. Ол курдук сиэккэ баайыыта, иистэнии окуопа чүмэчитин оҥоруу. Намнары биэлиэтиэхпин баҕарабын, кинилэр 1449 чүмэйини оҥорон аҕаллылар. Ону кэлэр нэдиэлэҕэ ыытаары уган бэлэмнээн турабыт".

Ыстаапка иистэнээччилэр дьыл кэмигэр түбэһиннэрэн байыаннай дьайыыга туһалаах таҥаһы тигэн бэлэмнииллэр. Билигин Аҕа дойду көмүскээччилэрин күнүн көрсө манна бэлэх оҥорууга үлэ барар.

Дария Яковлева, Дьокуускай олохтооҕо: "Курдары илийбэт плащтары тигэ сылдьабыт. Кэлээри турар бырааһынньыкка бэлэх  гынан".

Марта Винокурова, Дьокуускай олохтооҕо: "Уолаттарбытыгар анаан балаакка буолар плащтары тигэбит. Онтубутун бэлэх гына анал мөһөөччүктэргэ угуохпут".

Саха сирин суһал ыстаабыгар хомуллубут  таҥас-сап, баһыылка опорнай пууҥҥа тиийэр онтон салгыы байыаннай чаастарга тарҕанар.